Almatydaǵy áýe apatyna bailanysty Bek Air áýe kompaniiasyna tiesili toǵyz Fokker-100 ushaǵynyń qyzmeti toqtatyldy. Bul týraly OKQ-da ótken baspasóz máslihatynda QR Indýstriia jáne infraqurylymdyq damý vitse-ministri Berik Kamaliev málim etti, dep habarlaidy "Ult aqparat".
«Qazaqstan Prezidentiniń tapsyrmasy boiynsha qazir turaqty túrde jolaýshylar tasymalyn júrgizip jatqan otandyq áýe kompaniialardyń bári tekserilip jatyr. Atap aitqanda, áýe kemeleriniń ushý jaramdylyǵy, qaýipsizdik talaptaryna sáikestigi, ushý erejelerin saqtaýy, aviatsiialyq personaldy daiyndaýy sekildi talaptardyń bári tekserilýde», - dedi Berik Kamaliev OKQ-da ótken baspasóz máslihatynda.
Vitse-ministr Almatydaǵy áýe apatyna bailanysty Bek Air áýe kompaniiasynyń jumysy toqtatylǵanyn aityp ótti.
«Bek Air áýe kompaniiasyna tiesili toǵyz Fokker-100 ushaǵynyń qyzmeti men jyldyq jaramdylyǵy jaily sertifikaty toqtatyldy. Qazaqstannyń aviatsiialyq ákimshiligi qazir britandyq jáne eýropalyq azamattyq aviatsiia agenttikteri ókilderiniń qatysýymen Bek Air áýe kompaniiasyn tekserip jatyr. Tekserý qorytyndysyna sai, áýe kompaniiasynyń ary qaraiǵy jumysy týraly sheshim qabyldanady. Jaqyn arada tekserý qorytyndysyn jariialaimyz», - dedi ol.
Eske sala ketsek, buǵan deiin QR Premer-Ministriniń orynbasary Roman Skliar BekAir ushaǵynyń apatqa ushyraý sebebiniń basty nusqasyn ataǵan bolatyn.
