Qazaqstan Respýblikasynyń Memlekettik hatshysy Gúlshara Ábdiqalyqova Qazaqstan halqy Assambleiasy Ǵylymi-sarapshylyq keńesiniń keńeitilgen otyrysyna qatysty, dep habarlaidy Aqordanyń baspasóz qyzmeti.
Jiynǵa Qazaqstan halqy Assambleiasy tóraǵasynyń orynbasary - Hatshylyq meńgerýshisi L.Prokopenko, Parlament Májilisiniń depýtattary, memlekettik organdar ókilderi, Qazaqstan halqy Assambleiasy Ǵylymi-sarapshylyq keńesiniń músheleri, Assambleianyń ǵylymi-sarapshylyq toptary men kafedralarynyń jetekshileri, qoǵam qairatkerleri, sarapshylar, ǵylymi ziialy qaýym, etnomádeni birlestikter ókilderi qatysty.
Gúlshara Ábdiqalyqova quttyqtaý sózinde Elbasy Nursultan Nazarbaevtyń: «Barlyq kezeńde de tabysqa degen nyq senim men halyqtyń birligi ǵana el taǵdyryn sheshken. Birlesken kúsh-jigerimizdiń arqasynda ǵana biz uly asýlardy baǵyndyra alamyz», - degen sózine toqtaldy.
Memlekettik hatshy árbir qazaqstandyqtyń jańǵyrýlar úderisine atsalysý sezimin qalyptastyrý jolyndaǵy Qazaqstan halqy Assambleiasynyń qyzmetin ǵylymi-sarapshylyq turǵydan qoldaýdyń mańyzdylyǵyna, sondai-aq qoǵamdyq sanaǵa «Rýhani jańǵyrýdyń» biriktirýshi ári jasampazdyq áleýetin tereń sińirý qajettigine toqtaldy.
- Prezident jariialaǵan Jastar jyly aiasynda jastarǵa jáne otbasy institýtyna qoldaý kórsetý ǵylymi-sarapshylyq jumystyń mańyzdy baǵyty bolýǵa tiis, - dedi Memlekettik hatshy.
Otyrysta júrgizilgen zertteýler nátijeleri men áleýmettik-demografiialyq jáne etnosaralyq saladaǵy 2019-2020 jyldarǵa arnalǵan ǵylymi jumystar josparlary, sondai-aq Qazaqstan halqy Assambleiasynyń «Qazaqtaný», «Uly dala Eliniń kieli murasy» jobalarynyń júzege asyrylý barysy talqylandy.
Shyǵys Qazaqstan oblystyq tarihi-ólketaný mýzeiiniń «Dala Ámirshileriniń Altyny» kórmesi men E.Bóketov atyndaǵy QarMÝ-diń Saryarqa arheologiialyq institýtynyń kórmesi uiymdastyryldy. Ǵylymi-sarapshylyq keńes músheleriniń, Ál-Farabi atyndaǵy QazUÝ-diń Qazaqstan halqy Assambleiasy kafedraaralyq ǵylymi-aǵartý ortalyǵynyń jáne E.Bóketov atyndaǵy QarMÝ-diń Qazaqstan halqy Assambleiasy kafedrasynyń jańa ǵylymi materialdarynyń tanystyrylymy ótti.
