Foto: Inbusiness.kz
Qazaqstanda óńirlik bazarlarda baǵanyń ashyq qalyptasýyn qamtamasyz etý baǵytyndaǵy sharalar kúsheitildi, dep habarlaidy Ult.kz.
Qazaqstan Respýblikasynyń Saýda jáne integratsiia ministrligi Premer-ministrdiń tapsyrmasy aiasynda ónimsiz deldaldardy qysqartý jumystaryn jandandyrdy. Negizgi maqsat – baǵanyń negizsiz ósýine áser etetin faktorlardy joiý jáne ashyq taýar ótkizý tizbegin qalyptastyrý.
16 sáýirde Saýda komitetiniń tóraǵasy Ernur Jáýtikbaev Túrkistan qalasynda Túrkistan, Qyzylorda, Jambyl oblystary men Shymkent qalasynyń bazar ieleri jáne saýda nysandary ákimshilikterimen keńes ótkizdi.
Jiynda ishki saýda qaǵidalaryn jetildirý máseleleri qaralyp, bólshek saýda men kóterme jetkizýshilerdiń arajigin naqty ajyratý arqyly jetkizý tizbegin júieleý qajettigi aityldy. Bul óz kezeginde qosylǵan qun qalyptastyrmaityn, biraq sońǵy baǵaǵa áser etetin artyq deldaldardy shekteýge múmkindik beredi.
Sondai-aq bazarlarda aqparattyq júielerdi mindetti túrde engizý talaby kúsheitilmek. Barlyq sharttar, jaldaý tólemderi men saýda talaptary tsifrlyq formatta tirkelýi tiis. Ministrlik ókilderiniń aitýynsha, mundai júieniń bolmaýy kóleńkeli ainalym men beiresmi esep aiyrysýlarǵa jol ashady.
Ernur Jáýtikbaevtyń sózinshe, qazirgi tańda bazar qyzmetine keshendi baqylaý júrgizilýde. Bul jumysqa memlekettik kirister organdary, ishki ister organdary, antimonopoliialyq qurylymdar jáne jergilikti atqarýshy organdar tartylǵan. Sonymen qatar saýda salasynda hronometraj tetigi kúsheitilip, naqty ainalym men deklaratsiialanǵan kórsetkishter salystyrylýda.
Baqylaý nátijesinde zań buzýshylyqtar anyqtalǵan jaǵdaida tiisti uiǵarymdar berilip, talaptardy oryndamaǵan sýbektilerge aiyppul salý jáne sot arqyly qatań sharalar qoldaný qarastyrylǵan.
«Bazar – jasyryn shemalarǵa oryn emes. Árbir qatysýshy zań aiasynda jumys isteýi tiis. Saýda tolyqtai ashyq ári tsifrlyq formatta júrgizilýi qajet», – dedi komitet tóraǵasy.
Búginde óńirlerde oblys ákimderiniń orynbasarlary jetekshilik etetin arnaiy komissiialar jumys isteidi. Olar taýar jetkizý tizbekterin taldap, tiimsiz deldaldardy anyqtap, olardy júieden shyǵarý sharalaryn qabyldaýda. Alaida keibir óńirlerde bul jumys jetkilikti deńgeide júrgizilmei otyrǵany atap ótildi.
Jyl basynan beri elimizde 316 komissiia otyrysy ótip, nátijesinde 76 deldaldyq býyn saýda tizbeginen shyǵarylǵan.
Ministrlik ákimdikterge bul baǵyttaǵy jumysty kúsheitip, ashyq ári tiimdi saýda júiesin qalyptastyrýdy tapsyrdy. Sarapshylardyń pikirinshe, mundai sharalar kóleńkeli ekonomikany azaityp, halyq úshin ádil baǵa qalyptastyrýǵa yqpal etedi.
