Qazaqstanda bazalyq zeinetaqyny arttyrý máselesi qarastyrylyp jatyr. Eńbek jáne halyqty áleýmettik qorǵaý ministri Tamara Dúisenovanyń aitýynsha, qazirdiń ózinde barlyq esep pen usynys jumys tobynyń qaraýyna jiberilgen, - dep habarlaidy Tengrinews.kz.
"Biz barlyq usynys, esepteýimizdi jumys tobyna beremiz. Onyń quramynda Qarjy ministrligi men Ulttyq ekonomika ministrlikteriniń basshylary bar. Birinshi kezeńde barlyq esepteýlerimizdi usyndyq. (...) Búgin birinshi kezeńdi aiaqtadyq. Endi ekinshi kezeń Qarjy jáne Ulttyq ekonomika ministrleri deńgeiinde qarastyrylady. Sodan keiin respýblikalyq biýdjet komissiiasyna baramyz", - dedi Dúisenova Májilis kýlýarynda.
Eńbek ministrligi basshysynyń aitýynsha, bazalyq zeinetaqy parametrlerin ózgertý usynyldy.
"Zeinetaqy júiesine keletin bolsaq. Biz qazir taǵaiyndap jatqan jiyntyq zeinetaqynyń mólsheri byltyrǵymen salystyrǵanda azaiyp barady, óitkeni eńbek ótili qysqa. Osyǵan bailanysty qazir bazalyq zeinetaqynyń parametrlerin arttyrýǵa bolatyndai etip ózgertý týraly óz esepteýlerimizben usynys engizdik. Ekinshisi, yntymaqty zeinetaqynyń parametrlerin ózgertý, ony da kóbeitýge bolady. Úshinshiden, qoldanystaǵy zańnama aiasynda zeinetke erte shyǵý múmkindigi bar. Zeinetaqy annýiteti máselelerin qarastyryp jatyrmyz", - dedi Dúisenova.
