Prezident Qasym-Jomart Toqaev 5 qyrkúiekte Qostanai oblysyna barady. Bul týraly óziniń Facebook paraqshasynda Memleket basshysynyń baspasóz hatshysy Rýslan Jeldibai jazdy. Jumys sapary aiasynda Prezident aǵartýshy, ult ustazy Ahmet Baitursynulynyń 150 jyldyq mereitoiyna arnalǵan resmi is-sharalarǵa qatysady, dep habarlaidy "Ult aqparat" Habar24 arnasyna silteme jasap.
Aǵartýshy Ahmet Baitursynulynyń eńbek joly men ómiri biyl erekshe nazarda. Meireitoi aiasynda Aqkólde Ahmet Baitursynulynyń ata-anasy jatqan kesenege topyraq salý rásimi ótedi. Ult ustazynyń kindik qany tamǵan orynda mýzei úii jáne Torǵaida Ahmet Baitursynuly men Mirjaqyp Dýlatulynyń jańa eskirtkishi ashylady.
"Oblysymyzda Alash arysy Ahmet Baitursynulynyń mereitoiyna arnalǵan infraqurylymdyq jobalar josparǵa sáikes iske asyrylyp jatyr. Jergilikti turǵyndardyń suraýy boiynsha Ahmet Baitursynuly aýylyna aparatyn joldyń jáne Torǵai ózeni arqyly ótetin kópirdiń jóndeý jumystary bastalyp ketti. Sonymen qatar jańadan meditsinalyq pýnkt salynyp, Aqkóldegi aýyldyq ambýlatoriiasy jóndeýden ótkiziledi" - deidi Qostanai oblysynyń ákimi Arhimed Muhambetov.
Al mynaý - Meksikadaǵy eń kóne ári tanymal Chichen-Itsa memorialynyń qazaqsha nusqasy. Qazaqsha deitinimiz munda qazaq ulty úshin eńbek etken tulǵalarǵa arnalyp, eskertish tas ornatylady. Qurylysshylar kúzge deiin jumysty aiaqtaýǵa nietti.
"Besinshi qyrkúiekte - qazaqtyń uly tulǵasy Ahmet Baitursynovtyń 150 jyldyǵy. Soǵan arnap myna memorial degen ǵimaratty salyp jatyrmyz. Onyń ishinde 12 adamnyń dene topyraǵy bolady. Basyna qoiylǵan belgi bolady. Sonyń ishinde bireýi - Ahmet Baitusyrynovtyki. Onyń syrtynda Torǵai óńirinde týyp, kúlli qazaq eline belgili bolǵan tulǵalar. Aita ketsek, Shaqshaq Jánibek, Ybyrai Altynsarin, Amankeldi Imanov, Keiki batyr, Ahmet Baitursynov, Ahmet Birimjanov syndy 12 adam" - deidi týristik keshenniń avtory Sapar Ysqaqov.
Aǵartýshynyń eńbek jolyn zertteý jumystary jalǵasyp jatyr. Bir apta buryn filologtar arnaiy ekspeditsiiaǵa shyqty. Bul joly zertteýshi top Meńdiqara aýdanyna baǵyt aldy. Bir kezderi Ahmet Baitursynuly osy aýdandaǵy Orynbaev mektebinde muǵalim bolyp qyzmet atqarǵan. Biraq bilim oshaǵynyń qashan ashylǵandyǵy týraly naqty maǵlumat joq. Bul ekspeditsiianyń maqsaty - aǵartýshynyń kópke beimálim ómirbaianynyń osy bir bóligin tolyqtyrý.
"Ekspeditsiianyń qorytyndysyn Ybyrai Altynsarin atyndaǵy mektepte shyǵarǵaly otyrmyz. Sebebi kezinde osy mekteptiń qabyrǵasynda Qostanai pedagogikalyq synyby jumys jasaǵan. Atalǵan synypta Ahmet Baitursynuly qazaq tilinen sabaq bergen edi. Mineki ekspeditsiiany uiymdastyra otyryp, biz qoǵamdy, jurtshylyqty Ahmet Baitursynovtyń Qostanai kezeńine nazar aýdartqymyz keledi" - deidi ekspeditsiia jetekshisi Almas Ábsadyq.
Ult ustazynyń eńbegi týraly Muhtar Áýezovten artyq eshkim aitqan aitqan emes. Zańǵar jazýshy óz sózinde bylai deidi: «Ahań ashqan qazaq mektebi, Ahań túrlegen ana tili, Ahań salǵan ádebiettegi elshildik urany – «Qyryq mysal», «Masa», «Qazaq» gazetiniń qan jylaǵan qazaq balasyna istegen eńbegi, óner-bilim, saiasat jolyndaǵy qajymaǵan qairaty, biz umytsaq ta, tarih umytpaityn ister bolatyn».
