Tsifrlyq damý ministrligi ókilderi Qazaqstanda Internet sapasynyń tómendigi úshin aiyppul mólsheri qalai ózgeretinin aitty, - dep habarlaidy "Ult aqparat" vedomstvonyń baspasóz qyzmetine silteme jasap.
"Keshe Memleket basshysy «Qazaqstan Respýblikasynyń Ákimshilik quqyq buzýshylyq týraly Kodeksine ózgerister men tolyqtyrýlar engizý týraly» Qazaqstan Respýblikasynyń Zańyna qol qoidy. Buǵan deiin Prezident bailanys salasyndaǵy tutynýshylardyń quqyqtaryn qorǵaýdy kúsheitýdi, internet-bailanystyń naqty parametrleriniń operatorlar málimdegen parametrlerden aitarlyqtai alshaqtyǵy úshin jaýapkershilikti engizýdi jáne qatańdatýdy tapsyrǵan bolatyn.
Tapsyrmany iske asyrý úshin Qazaqstan Respýblikasynyń tsifrlyq damý, innovatsiialar jáne aeroǵarysh ónerkásibi ministrligi depýtattyq korpýspen birlesip, operatorlardyń paidalanýshylarǵa standarttarǵa, tehnikalyq normalar men sapa kórsetkishterine sáikes kelmeitin bailanys qyzmetterin kórsetkeni úshin jaýapkershiligin kúsheitýge baǵyttalǵan sharalardy ázirledi.
Endi buzýshylyqtar anyqtalǵan jaǵdaida bailanys operatorlary 100 AEK ornyna 1000 AEK-ke aiyppul salady, al bir jyl ishinde qaitalap buzǵan jaǵdaida aiyppul somasy 200-den 1500 AEK-ke deiin ósedi" - delingen habarlamada.
Tsifrlyq damý, innovatsiialar jáne aeroǵarysh ónerkásibi ministrligi júrgizgen taldaý kórsetkendei, bailanys sapasynyń nasharlyǵyna shaǵym sany 10 ese ósip otyr. 2021 jyldyń qorytyndysy boiynsha ministrlik 562 tekserý júrgizgen (2020 jyly 51 tekserý, al 2019 jyly 93 tekserý júrgizildi).
"Operatorǵa qatysty bailanystyń nemese Internettiń nashar sapasyna tekserý júrgizý úshin qazaqstandyqtar resmi ótinishti Telekommýnikatsiialar komitetiniń (TsDIAÓM) ne tiisti oblys ministrliginiń aýmaqtyq bailanys inspektsiiasynyń mekenjaiyna «elektrondyq úkimet» portaly, «E-Otinish» ótinishter berý júiesi arqyly ne qaǵaz túrinde joldaýlary qajet. Ótinishte shaǵymnyń mánin, bailanys operatorynyń ataýyn jáne tekserý júrgizý qajet ótinish berýshiniń naqty mekenjaiyn kórsetý mindetti.
Ótinishti alǵannan keiin prokýratýra organdarynda tekserýdi taǵaiyndaý týraly akt tirkeledi. Tekserý barysynda kórsetiletin bailanys qyzmetteriniń sapasy boiynsha ólsheýler júrgiziledi. Operatorǵa qatysty buzýshylyqtar anyqtalǵan jaǵdaida Ákimshilik quqyq buzýshylyq týraly kodekstiń 637-babyna sáikes aiyppul túrinde ákimshilik hattama jasalady jáne laýazymdy tulǵa belgilegen merzimge buzýshylyqtardy joiý týraly nusqama engiziledi" - delingen vedomstvo habarlamasynda.
