Biylǵy oqý jylynan bastap, Baiqońyrdaǵy 6 mektep qazaqstandyq bilim berý standartyna kóshken bolatyn. Búgin Ortalyq kommýnikatsiialar qyzmetinde ótken baspasóz májilisinde Qyzylorda oblysy ákiminiń orynbasary Rýslan Rústemov mektepter qazaqstandyq standartqa kóshkeli muǵalimderdiń jalaqysy kóbeigenin aitty, dep habarlaidy Baq.kz tilshisi.
«Biylǵy jańa oqý jylynan bastap, 6 mektep jáne bir balabaqsha qazaqstandyq bilim berý standartyna kóshti. Aita keterligi, qazaqstandyq standartqa kóshkeli 6 mektep pen balabaqsha da sońǵy úlgidegi jańa texnologiiamen qamtamasyz etildi. Oǵan qarjy oblystyq biýdjetten bólindi. Osynda jumys isteitin ustazdar men tárbieshilerdiń jalaqysy Reseidegi standartpen oqyǵan kezdegiden óskeni baiqalady», - dedi Qyzylorda oblysy ákiminiń orynbasary.
Onyń aitýynsha, qazirgi kezde Baiqońyrdaǵy 6 mektepte 4755 bala bilim alady. Al bir balabaqshada 177 bala ózimizdiń júie boiynsha bilim alýda. Endi, ol mektepterdi kúrdeli jóndeýden ótkizý, materialdyq jaǵdailaryn jaqsarta berý nazarda bola beredi.
«Bul jóninde oblys ákimi Qyrymbek Kósherbaevtyń jaqsy ustanymy bar. «Biz Baiqońyr ǵarysh ailaǵyn jalǵa bergenimizben, azamattarymyzdy jalǵa bergen joqpyz» , degen bolatyn. Búgingi kúni Baiqońyrda 40 myńnan astam Qazaqstan azamaty bar.Olar bolashaqta memleketten tiisti áleýmettik kómekterin ala beretin bolady», -deidi oblys ákiminiń orynbasary.
Aita keteiik, Baiqońyrda jalpy bilim beretin 14 mektep bar. Onda 9000-ǵa jýyq oqýshy bilim alady. Onyń ishinde altaýy qazaq mektebi.
