Baiqońyr qalasynda turatyn Qazaqstan azamattaryna páterlerin jekeshelendirý múmkindigin berý máselesi pysyqtalyp jatyr. Bul jaiynda Májilis depýtattarynyń saýalyna QR Premer-Ministri Asqar Maminniń jaýabynda aitylǵan, dep habarlaidy "Ult aqparat".
Aita keterligi, Májilistiń bir top depýtaty Baiqońyr qalasynda tirkelgen Qazaqstan azamattaryna turǵyn úi kómeginiń mólsherin ulǵaitý jáne turǵyn úidi jekeshelendirý tetigin pysyqtaý máselesin kótergen bolatyn.
Osy máselege qatysty jaýap bergen Úkimet basshysy Qyzylorda oblysynyń ákimdigi 2021 jyldan bastap turǵyn úi-kommýnaldyq qyzmetterdi tóleý boiynsha shyǵyndardy óteý úshin otbasylyq jiyntyq tabysynyń 10 paiyzy mólsherinde (qazir 14% quraidy) shekti jol beriletin shyǵystar úlesin belgileýdi josparlap otyrǵanyn aitady. Al bul turǵyn úi kómegin alatyn azamattardyń sanyn arttyrýǵa múmkindik beredi.
«Baiqońyr qalasynyń turǵyn úi qory Baiqońyr qalasynyń Ákimshiliginiń qaraýynda. 1995 jylǵy 23 jeltoqsandaǵy Qazaqstan Respýblikasy men Resei Federatsiiasy arasyndaǵy Baiqońyr qalasynyń mártebesi jáne ondaǵy atqarýshy ókimet organdaryn qurýdyń tártibi men olardyń mártebesi týraly Kelisimniń 10-babynyń 5-tarmaǵyna sáikes, Baiqońyr qalasynda turǵyn úidi (páterlerdi) jekeshelendirý júrgizilmeidi. Qazirgi ýaqytta Qyzylorda oblysynyń ákimdigi múddeli memlekettik organdarmen jáne Baiqońyr qalasynyń ákimshiligimen birlesip, Qazaqstan Respýblikasynyń qoldanystaǵy zańnamasyna sáikes jaldaýshylary Qazaqstan azamattary bolyp tabylatyn páterlerdi (páter boiynsha) naqty jekeshelendirý tetigin ázirleý boiynsha jumys júrgizýde. Sondai-aq Resei tarapymen odan ári kelisý úshin jekeshelendirýdiń usynylyp otyrǵan tetigi boiynsha Qazaqstan tarapynyń biryńǵai ustanymy pysyqtalýda», - dedi Asqar Mamin.
