25 mamyrda ótken qalalyq jedel shtabtyń otyrysynda Baiqońyr aýmaǵynda koronavirýs infektsiiasy boiynsha karantindi 2020 jyldyń 15 maýsymyna deiin uzartý sheshimi qabyldandy, dep habarlaidy "Ult aqparat".
Buǵan deiin shekteý sharalaryn 1 maýsymda alyp tastaý josparlanǵan edi. Shtab otyrysynda Reseidiń Federaldy mediko-biologiialyq agenttigi «Baiqońyr» kesheniniń óńirlik basqarmasynyń basshysy Andrei Popov koronavirýs infektsiiasyn juqtyrǵan jańa jaǵdailar týraly habarlady.
Jalpy alǵanda Baiqońyrda jaǵdai turaqty: 241 adam óz úilerinde oqshaýlandyryldy. Infektsiiaǵa 287 test tapsyryldy. Onyń 7-eýi oń nátije kórsetti (16-24 mamyr). Qyzylorda oblysyndaǵy sanitarlyq-epidemiologiialyq jaǵdaidy eskere otyryp, shtab músheleri COVID-19 indetiniń taralýyn aldyn alý boiynsha shekteý sharalaryn 2020 jyldyń 15 maýsymy saǵat 00:00-ge deiin uzartýdy sheshti.
Osy kúnge deiin baqylaý-ótkizý pýnkterinde shekteýler saqtalady. Baiqońyr qalasy, Toretam kenti jáne Aqai aýyldyq okrýginiń turǵyndary baqylaý-ótkizý pýnkteri arqyly arnaiy ruqsat qaǵazdary boiynsha ótetin bolady.
Sonymen qatar, jedel shtabtyń sheshimimen kúsheitilgen sanitarlyq-dezinfektsiialyq rejim men áleýmettik qashyqtyqty saqtai otyryp, kórmeler men murajailardyń, menshik túrine qaramastan jabyq túrdegi sport nysandarynyń, fitnes-klýbtardyń jáne sport zaldarynyń qyzmetine ruqsat etildi.
