Túrkistan oblysy, Báidibek aýdany, Aǵybet aýylynan «Aýyl – El besigi» jobasy aiasynda dene shynyqtyrý-saýyqtyrý kesheni salynýda, dep habarlaidy «Ult aqparat» Túrkistan oblysy ákimdiginiń baspasóz qyzmetine silteme jasap.
Sport kesheniniń aýmaǵy – 0,60 ga. Jobaǵa sáikes nysanda bir aýysymda 20 oqýshy jattyǵady. Jattyqtyrýshy zaly, kiim aýystyrý men jýynatyn jáne medpýnkt, qural-jabdyqtar saqtaityn bólmeleri qarastyrylǵan. Turaqty jumyspen 4 adam qamtylatyn bolady.
Qurylys jumystaryn biyl qarasha aiynda aiaqtap, el igiligine paidalanýǵa berý josparlanýda. Esirkep batyr atyndaǵy jalpy orta mektebiniń sport zaly men bir bólmesin paidalanyp jatqan aǵybettik 100-den asa jasóspirim osy jyldyń sońynda jańadan iske qosylatyn dene shynyqtyrý-saýyqtyrý kesheninde sporttyń birneshe túrinen shynyǵyp, shyńdalatyn bolady.
Aǵybet aýylynyń turǵyndary qurylysy qarqyndy júrgizilip jatqan sport kesheni salaýatty ómir saltyn ustanýǵa úndeitin, jastardy buqaralyq sportqa tartatyn tárbie oshaǵy bolatynyna senimdi.
