Vashington jaqyn kúnderi Ýkrainaǵa 800 million dollardyń qarý-jaraǵyn qosymsha kómek retinde beretinin jariialamaq, onyń ishinde áýe shabýylynan qorǵaný júieleri de bar. Bul týraly AQSh prezidenti Djo Baiden Madridte ótken NATO sammitiniń qorytyndysy boiynsha málimdedi, dep habarlaidy Azattyq.
"Biz Ýkrainaǵa qansha qajet bolsa, sonsha kómek beremiz" - dep buǵan deiin aitqanyn taǵy qaitalady Baiden.
AQSh prezidentiniń sózinshe, Reseige kórshi eldiń jerine basyp kirgeni tym qymbatqa túsedi, al Ýkraina bul soǵysta jeńilmeidi.
Baiden buǵan qosa osy soǵystyń Reseige qalai áser etkenine nazar aýdardy. Onyń aitýynsha, ekonomikadaǵy 15 jylǵy jetistigi kózden bul-bul ushqan Resei, sanktsiialarǵa bailanysty birqatar tehnologiialardan aiyrylǵandyqtan, qazir munai óndirý isinde qiyndyqqa tap bolǵan.
"Ýkraina qazirdiń ózinde Reseige qatty soqqy berdi – Resei halyqaralyq bedelinen airyldy. Resei qazir kúlli álem oǵan qarap: "Búkil eldi jaýlap alam, Kievti basyp alam dep dámelendińder de, sóitip jeńildińder. Donbassty basyp almaq boldyńdar, áli kúnge deiin odan túk shyqpady" dep aitqan jaǵdaiǵa tap boldy" dedi ol.
Baiden Resei prezidenti Vladimir Pýtinge soǵys bastalmai turyp "eger Ýkrainaǵa basyp kiretin bolsań, NATO kúsheiip qana qoimai, burynǵydan da jumyla túsedi" dep eskertkenin aitty.
"Pýtin bizdiń aliansqa iritki salamyn dep oilady. Ol bizdi álsizdik tanytady, alians syr beredi degen oida boldy. Al is júzinde barlyǵy múlde kerisinshe bolyp shyqty. Ol NATO-ny Finliandiia siiaqty [beitarap] qylamyn dep oilady, al shyn máninde Finliandiianyń NATO-ǵa burylǵanyn kórip otyr" dep málimdedi AQSh prezidenti.
Buǵa qosa ol Shvetsiia men Finliandiia soltústik-atlantikalyq alians qataryna qosylǵannan keiin NATO shekarasy 800 milge ulǵaiatynyn aitty.
