AQSh prezidenti Djo Baiden Kornel ýniversitetiniń professory Sáýle Omarovany aqsha ainalymyn baqylaý basqarmasynyń (Office of the Comptroller of the Currency, OCC) basshysy qyzmetine taǵaiyndaýdy josparlap otyr. Bul basqarma Amerikadaǵy bank sektorynyń negizgi retteýshisi bolyp sanalady. Bul týraly Bloomberg.com habarlady, dep jazady Sputnik Qazaqstan.
Taǵaiyndaý jumysymen tanys úsh birdei adam Sáýle Omarovanyń bir apta ishinde basqarma jumysyna tartylatynyn rastady. Alaida Aq úi aqparatty resme túrde naqtylaǵan joq. Qazaqstannyń týmasy Sáýle Omarova osy qyzmetke taǵaiyndalsa, AQSh tarihynda alǵash ret bank sektorynyń negizgi retteýshisin áiel adam basqarady.
"Aqsha ainalymyn baqylaý basqarmasy eldiń iri kreditorlaryn baqylaidy. Olardyń ishinde JPMorgan Chase & Co., Bank of America Corp. jáne Citigroup Inc. bar. Kornel ýniversitetiniń zań fakýltetinde dáris berip júrgen Omarova tańdalsa, Ýoll-stritke ońai bolmaidy. Qatty baqylaý men qatań erejeler engiziledi degen boljam bar", - deidi maqala avtory.
Professor Sáýle Omarova kriptovaliýtanyń qarsylasy bolyp sanalady. Ol óziniń ǵylymi jumysynda kriptovaliýtanyń bank salasyna qandai qaýip tóndiretinin jan-jaqty kórsetken.
Aita keteri, biyl tamyz aiynyń basynda AQSh qarjy ministrligi valiýtalyq baqylaý basqarmasynyń basshysy qyzmetine Sáýle Omarovanyń kandidatýrasy usynylǵany týraly aqparat taratqan. Oǵan deiin osy qyzmetke úmitker eki adam boldy. Alaida Demokratiialyq partiianyń ishinde ózara tartys bastaldy. Aq úi eki kandidatýradan da bas tartyp, professor Sáýle Omarovany qarastyrýǵa kiristi.
