AQSh prezidenti Djo Baiden Resei Ýkrainaǵa basyp kirse, Vladimir Pýtinge sanktsiia salýǵa daiyn ekenin málimdedi. Bul jóninde "Amerika daýysy" saity habarlady, dep jazady Azattyq.
Baiden eger Resei Ýkrainaǵa ásker kirgizse, saldary "aýyr" bolatynyn eskertti.
Prezident sonymen birge Amerikanyń 8,5 myń áskeri qyzmetkeri Shyǵys Eýropadaǵy NATO elderine dislokatsiia jasaýǵa daiyn otyrǵanyn jetkizdi. Onyń aitýynsha, degenmen AQSh Ýkrainaǵa ásker jibermeidi.
Conflict Intelligence Team tobynyń zertteýshileri 2021 jyly Resei armiiasy Ýkrainamen shekarasyna artilleriia men tank, motoatqyshtar men desanttaryn ákep jatyr dep habarlaǵan. Ýkrainamen shektesetin Reseidiń Voronej oblysyna byltyr kóktemde "Eskendir" zymyran kesheni de ákelingeni aitylǵan. 2022 jyly qańtarda Conflict Intelligence Team Reseidiń batys aimaqqa taǵy ásker jetkizgeni jóninde aiǵaqtar jariialady.
Byltyr kúzden beri aqparat quraldarynda Resei áskeriniń Ýkraina shekarasy mańyna shoǵyrlanǵany týraly kóp málimet jariialandy. AQSh pen ózge de Batys elderi Máskeý áskeri shabýylǵa daiyndalyp jatyr dep boljaidy. Kreml muny joqqa shyǵaryp otyr.
NATO músheleri Ýkrainadaǵy jaǵdaiǵa bailanysty Shyǵys Eýropaǵa qosymsha kúshterin shoǵyrlandyra bastaǵan. AQSh qorǵanys ministri Lloid Ostin 25 qańtarda 8,5 myń áskerin daiyndyq rejimine kóshirgenin, Shyǵys Eýropaǵa jóneltýge daiyn ekenin aitty.
