9 mamyrda AQSh prezidenti Djo Baiden lend-liz týraly zańǵa (Ukraine Democracy Defence Lend-Lease Act of 2022) qol qoidy, ol Ýkrainaǵa jáne qajet bolǵan jaǵdaida 2022-2023 jyldary Shyǵys Eýropa elderine qarý-jaraq jetkizý protsesin jeńildetedi, - dep habarlaidy Tengrinews.kz tilshisi "Golos Ameriki" basylymyna silteme jasap.
Qujat mátininde bul elderdiń qorǵanys qabiletin nyǵaitýǵa jáne olardyń beibit turǵyndaryn shabýyldan nemese Reseidiń jalǵasyp jatqan agressiiasynan qorǵaýǵa kómektesý úshin jasalǵany aitylǵan.
Zań AQSh prezidentine qosymsha ókilettik beredi. Endi Ýkrainaǵa qorǵanys tehnikasyn jetkizý jáne jalǵa berý týraly sheshim AQSh-tyń ulttyq qaýipsizdik múddelerine sai kelse, uzaq biýrokratiialyq kezeńdersiz qabyldanady. Sonymen qatar, Ýkraina amerikalyq jabdyqtar men qarý-jaraqtardy alý úshin aldyn-ala tólem jasamaidy, tólemdi keiinge qaldyrýǵa bolady.
Buǵan deiin zań jobasy amerikalyq Kongresste eki partiianyń da qoldaýyna ie bolǵan. Senat oǵan 7 sáýirde, al Ókilder palatasy 28 sáýirde daýys berdi.
Bul - AQSh tarihyndaǵy ekinshi "lend-liz". Bul zań alǵash ret ekinshi dúniejúzilik soǵys kezinde qoldanylyp, Gitler basqarǵan Germaniiany jeńýde mańyzdy rol atqarǵan. Zań 1941 jyly naýryzda prezident Franklin Delano Rýzvelttiń bastamasymen Gitlermen soǵysyp jatqan Ulybritaniiaǵa kómektesý úshin qabyldandy. Al 1941 jyldyń qazanynan bastap AQSh nesie týraly zań aiasynda Keńes Odaǵyna kómek kórsete bastady.
