Nur Otan partiiasy tóraǵasynyń birinshi orynbasary Baýyrjan Baibek jumys saparymen Qaraǵandy oblysynda júr, dep habarlaidy "Ult aqparat".
«Óńirlerge sapar aiasynda Jezqazǵan qalasynda bolyp, osyndaǵy iri kásiporyn – «Kazakhmys Smelting» mys qorytý zaýytynyń qyzmetkerlerimen kezdestim. Óndiriste eńbek quqyǵynyń saqtalýy, jańa jumys oryndaryn ashý, jalpy qalanyń damýy týraly máselelerdi talqylap, oi bólistik. Filial basshylyǵynyń aitýynsha, pandemiia jaǵdaiynda óńir ekonomikasy qalypty kúide ustalyp, qyzmetkerlerdiń jappai jumystan bosatylýyna, jastar jumyssyzdyǵynyń ósýine jol berilmegen. Áitse de, COVID-19-ǵa bailanysty ahýal eńbek naryǵyna óz áserin tigizbei qoimady. Týrizm, mádeniet, sport, qoǵamdyq tamaqtaný, kólik jáne taǵy basqa salalar zardap shekti» dep jazady Baýyrjan Baibek Facebook paraqshasynda.
Partiia tóraǵasy orynbasarynyń aitýynsha, jańa syn-qaterlerdi eskere otyryp, «Nur Otan» partiiasy eńbek naryǵynyń suranysyn eskere kele, jańa turaqty jumys oryndaryn ashý, kadrlardy qaita daiarlaý boiynsha keshendi sharalardy qolǵa alady.
Bul rette otandyq óndirýshilerge qoldaý kórsetýge, básekege qabiletti jáne importty almastyratyn ónimder shyǵaratyn jańa óndiris oryndaryn ashýǵa basymdyq beriledi.
«Bul mindetter bizdiń Jezqazǵan qalasy boiynsha qalalyq sailaýaldy baǵdarlamamyzda qamtylǵan. Ol qarasha aiynda halyqpen keńinen talqylaý negizinde qabyldanǵan bolatyn. Sonymen qatar jańa modýldi infektsiialyq klinikada qalanyń meditsina qyzmetkerlerimen kezdestim. Densaýlyq saqtaý salasyndaǵy túitkildi máselelerdi tyńdadym. Olardyń basym bóligi óńirlik sailaýaldy baǵdarlamany iske asyrý aiasynda óz sheshimin tabady. Bulardyń qatarynda qalalyq kóp beiindi aýrýhanaǵa kúrdeli jóndeý júrgizý, jas dárigerlerge arnalǵan jataqhana jáne basqa máseleler bar. Budan keiin óńirdiń jas belsendilerimen kezdesý ótkizdim. Olardyń kópshiligi «Nur Otan»-nyń óńirlik praimerizinde jeńimpaz bolyp, qalalyq máslihat sailaýyna arnalǵan partiialyq tizimge engen. Jalpy, Jezqazǵan boiynsha partiialyq tizim 60%-ke jańarsa, ondaǵy jastardyń úles sany 0-den 23%-ke ósti» dep málimdedi partiia basshysy.
Baýyrjan Baibek óńirge sapar barysynda Ulytaý aýdanynda da boldy. Elbasy, partiia lideri N.Á. Nazarbaev erekshe atap kórsetkendei, Ulytaý – qazaq halqynyń qasietti óńiri.
Sondyqtan tarihi murany saqtaý jáne elimizdiń aýmaǵy jaǵynan eń iri aýdanyn ary qarai damytý aldaǵy 5 jylǵa arnalǵan partiialyq mindetterde kórinis tapqan.
«Memleket basshysy Q.K. Toqaev óńirge jasaǵan saparlarynyń birinde «Ulytaý – halyqaralyq deńgeidegi etnografiialyq týrizmniń ortalyǵy bolýy tiis», – dep atap kórsetken bolatyn. Búginde munda birqatar jańa nysandar boi kóterip, vizit-ortalyq pen stadion salynǵan, birneshe saiabaq pen alleia abattandyrylǵan. Ólketaný mýzeiiniń, ippodrom men qonaq úiler qurylysy júrip jatyr. Sonymen birge, elimizdiń orta ǵasyrlyq arhitektýralyq eskertkishteriniń biri – Joshy han kesenesiniń rekonstrýktsiiasymen tanystym. Altyn Ordanyń 750 jyldyǵy aiasynda tarihi-mádeni keshenniń qurylysy júrgizilýde. Ony kelesi jyldyń jeltoqsan aiynda ashý josparlanyp otyr. Bul keshen de týristerdi qyzyqtyratyn taǵy bir ǵajaiyp orynǵa ainalatynyna senimdimin» dep túiindedi Baýyrjan Baibek.
