Qazaq-jońǵar soǵystary men qazaq-qytai qatynasy kezinde erligimen jáne diplomatiialyq qabiletimen kózge túsken Qojabergen batyr Jánibekulyna Mońǵoliianyń Baian-Ólgei aimaǵynyń ortalyǵynda eskertkish qoiyldy. Bul týraly Halyqaralyq Túrki akademiiasynyń baspasóz qyzmeti habarlady.
Músin batyrdyń 320 jyldyq mereitoiyna orai jasalǵan. Tuǵyrynan bastap, ustaǵan týynyń ushyna deiingi biiktigi 7 metr bolatyn eskertkish Ulanbatyr qalasynda, batyr urpaqtarynyń qarjysyna jasalǵan. Eskertkishke Ólgei qalasynyń ákimdigi arnaiy jer telimin bóldi.
Eskertkishtiń ashylý saltanatyna aimaq basshysy Ǵylymhan Aiyp, aimaqtyq quryltai basshysy Baýyrjan Dáleluly, ziialy qaýym ókilderi, Qazaqstannan barǵan batyr urpaqtary men jergilikti turǵyndar qatysty. Eńseli eskertkishke «Qojabergen batyr Jánibekuly - 320 jyl» dep jazylǵan.
Uiymdastyrýshylar bolashaqta eskertkishtiń qos qaptalyna batyrdyń jońǵar hanzadasy Ámirsanamen birge qytaiǵa qarsy júrgizgen joryqtary jaily arhivte saqtalǵan qujattardan úzindiler jazylǵan taqta ornatýdy josparlap otyr. Arhivterden, ásirese Qytaidaǵy Tsin patshalyǵynyń ortalyq arhivinen Qojabergen batyr Jánibekuly men Ámirsananyń 1756-57 jyldary birge júrgeni, Aiagóz óńirinde bolǵan qazaq-qytai shaiqasynan soń Tsin imperiiasynyń áskerlerine qarsy tize qosa kúres júrgizgeni, keiin Qojabergen batyrdyń Qazaq handyǵy men Qytaidyń arasyndaǵy saýda-sattyqta belsendi ról atqarǵany týraly derekter tabylǵan.
Biyl batyrdyń týǵanyna 320 jyl tolyp otyr. Osyǵan orai Mońǵoliiada bastalǵan shara Astanada jalǵasyp, 19 qazanda QR Qorǵanys ministrligi Áskeri-tarihi mýzeii men Sh.Ýálihanov atyndaǵy Tarih jáne etnologiia institýty birlesip, batyrǵa arnalǵan halyqaralyq konferentsiia ótkizýdi josparlap otyr. Batyrdyń shapanyn urpaqtary biyl Áskeri-tarihi mýzeiine tapsyrsa, joryqta ustaǵan týy Mońǵoliianyń Baian-Ólgei aimaǵyndaǵy urpaqtarynyń qolynda saqtaýly.
