«Nur Otan» partiiasy Tóraǵasynyń Birinshi orynbasary Baýyrjan Baibek «Adal bilim» jobasy aiasynda Sybailas jemqorlyqqa qarsy is-qimyl agenttiginiń qoldaýymen júzege asyp jatqan Qazaq gýmanitarlyq zań ýniversitetiniń jańa jobalarymen jáne kovorking-ortalyǵymen tanysty, dep habarlaidy "Ult aqparat".
Ýniversitet rektory Talǵat Nárikbaevtyń aitýynsha, sybailas jemqorlyqqa alyp kelýi múmkin jaǵdailardy azaitý maqsatynda búginde oqý ornyndaǵy barlyq qyzmet onlain túrde kórsetiledi.
«2014 jyly biz stýdentterge bir tereze qaǵidaty boiynsha qyzmet túrlerin alýǵa múmkindik beretin ortalyq ashtyq. Bul baǵyttaǵy jumystardy odan ary jalǵastyryp, qazir barlyq qyzmetti elektrondy túrde kórsetemiz. Sáikesinshe, ákimshilik shyǵyndar qysqardy, qosymsha alańdar bosap, ol jerden qazirgi zamanǵa sai kovorking ortalyǵyn ashtyq. Sondai-aq, biz arnaiy mobildi qosymsha ázirledik. Onyń kómegimen stýdent jataqhana alýǵa ótinish bildirýge, oqý qunyn esepteýge, edvaizerden keńes alý úshin jazylýǵa múmkindik alady», – dedi rektor.
Jastarmen júzdesý barysynda Baýyrjan Baibek Sybailas jemqorlyqqa qarsy is-qimyl baǵdarlamasynyń jáne Elbasy, «Nur Otan» partiiasynyń Lideri Nursultan Nazarbaevtyń bastamasymen qolǵa alynǵan partiia qyzmetin qaita jandandyrýǵa qatysty júzege asyp jatqan jumys barysy týraly aitty. Zań ýniversitetiniń stýdentterimen birge Memleket basshysy Qasym-Jomart Toqaevtyń Qazaqstan halqyna Joldaýynda kórsetilgen sot jáne quqyq qorǵaý júielerindegi reformalar, sybailas jemqorlyqpen júieli túrde kúresý, azamattardyń quqyqtaryn qorǵaýdy qamtamasyz etý jáne t.b. jaiy talqylandy.
«Tsifrlandyrý – sybailas jemqorlyqpen kúresýdiń jáne ony joiýdyń, jariialylyq pen kórsetiletin qyzmetterdiń sapasyn arttyrýdyń mańyzdy quraldarynyń biri. Búgingi tańda bul ýniversitette stýdentterge oqytýshylardy ózderi tańdaýǵa, olardyń jumysyn jasyryn túrde baǵalaýǵa jaǵdai jasalǵan. Bul óte mańyzdy. Óitkeni, jastar ózderiniń árbir isi úshin jaýapkershilikti sezinýi tiis. Biz joǵary oqý oryndaryndaǵy sybailas jemqorlyqqa qarsy is-qimyldarǵa airyqsha mán berip otyrmyz. Sebebi, eger adam jas kezinen bastap ádiletsizdik kóretin bolsa, onyń ómirge degen kózqarasy durys qalyptaspaidy», – dedi Baýyrjan Baibek.
Kezdesý sońynda «Nur Otan» partiiasy Tóraǵasynyń Birinshi orynbasary ýniversitet rektory Talǵat Nárikbaev pen óziniń «Nur Otan»-nyń qataryna ótkisi keletini týraly Elbasy Nursultan Nazarbaevqa hat jazǵan osy oqý ornynyń túlegi Erlan Tólegenovke partiialyq biletterin tabys etti.
