«Nur Otan» partiiasy tóraǵasynyń birinshi orynbasary Baýyrjan Baibek Túrkistan oblysyna sapary barysynda Otyrar aýdanynda bolyp, óńirdiń ziialy qaýymy ókilderimen kezdesti, dep habarlaidy "Ult aqparat".
Atalǵan sharaǵa qatysqan Túrkistan oblysynyń ákimi Ómirzaq Shókeev aimaqta atqarylyp jatqan jumystardyń barysy men partiialyq tapsyrmalardyń oryndalý barysyn baiandady.
Óz kezeginde sóz alǵan Baýyrjan Baibek elimizdiń bas partiiasy tarapynan atqarylyp jatqan jumystardy baiandap, aldaǵy josparly tapsyrmalardy tilge tiek etti. «Nur Otan» partiiasy tóraǵasy birinshi orynbasarynyń aitýynsha, biyl elimizde partiianyń uiytqy bolýymen 77 aitys ótedi.
«Biz aitys ónerin qoldaý arqyly ózimizdiń máselelerdi ashyq kóteremiz. Sol úshin aityskerlerdi qoldaimyz. Jalpy aitys – qazaqtyń kóneden kele jatqan dástúri. Sondyqtan ony qoldaý kerek. Halyq ony jaqsy kóredi», - dedi Baýyrjan Baibek.
Kezdesý barysynda aimaqtyń búgingi jai-kúii men óńirdiń qalyptasý kezeńindegi tolaiym tirlikter, kópti tolǵandyryp júrgen máseleler men rýhaniiat, til, ádebiet jaiy qamtyldy. Eldiń yntymaǵy men birligin nyǵaitý tarapyndaǵy usynys pikirler de ortaǵa salyndy. Máselen, jazýshy Marhabat Baiǵut Túrkistan qalasynan «Ádebiet álemi» ortalyǵyn ashýdy usyndy. Eger bul joba júzege assa, búginde ǵimaratsyz júrgen jazýshylar men jýrnalister odaǵynyń filialdary sonda ornalasa alady. Jańa oblys ortalyǵynyń ádebi ortasyn qalyptastyrýǵa yqpal etetin edi dep esepteidi jazýshy.
Sonymen qatar, onda túrli ádebiet úiirmeleri ashylyp, jas aityskerler men jazba aqyndar, jazýshylar bas qosatyn óner ortalyǵyna ainalar edi dep toqtady. Erkin pikir almasý formatynda ótken basqosýda óńir ziialylary oblys kólemindegi máselelermen qatar, jalpy el damýyna, memleketti órkendetýge qatysty óz oilary men usynystaryn da búkpesiz talqylady.
