«Nur Otan» partiiasynyń jinalysynda qala ákimi Baýyrjan Baibek áleýmettik máni bar sheshimderdi qabyldar kezde biýdjet shyǵynyn tekserip, ońtailandyrý júrgiziletinin aitty, dep habarlaidy QazAqparat tilshisi.
«Ýniversiadany eske alaiyqshy, ońtailandyrýdyń arqasynda operatsiialyq shyǵyndardyń ózinen ǵana 18 mlrd teńgeni únemdedik. Byltyr qalanyń kóshelerin, saiabaqtary men skverlerin rekonstrýktsiialaǵanda qarjynyń 40 paiyzyn únemdedik. Ótken aptada qalany damytý jónindegi jobalardy qaraǵan kezde Esentai ózeniniń jaǵalaýyn rekonstrýktsiialaý jobasy ońtailandyryldy. Bul jobany aldymen halyqpen birge talqylap, tolyqtyryp, sodan keiin ǵana júzege asyrý qajet. Biz qazirdiń ózinde 3,5 mlrd teńgeni únemdedik. Jalpy, birqatar negizsiz shyǵyndardan arylǵan jón. Mysaly, Jeńil atletika manejiniń qurylysy. Ony taǵy bir ret muqiiat qarap shyqsaq, edáýir únemge qol jetkizemiz dep oilaimyn», - dedi Almaty ákimi.
Únemdelgen qarjy burynǵydai qala turǵyndarynyń ótinishteri negizinde áleýmettik maqsattarǵa jumsalady.
Atap aitqanda, jańa jumys oryndaryn qurý, áleýmettik jaǵynan az qamtylǵandarǵa, onyń ishinde kópbalaly analarǵa jáne basqalarǵa kómek kórsetý spektrin ulǵaitý qolǵa alynady.
«Búgin Almaty biýdjeti áleýmettik baǵytqa negizdelgen, halyqty áleýmettik jaǵynan qamtýǵa bólinetin qarjy jyl saiyn ósýde. Biýdjettiń 50% nemese 200 mlrd teńgeden astam qarjy densaýlyq saqtaýǵa, bilim berýge, áleýmettik jaǵdaiy tómen jandardy qoldaýǵa, kommýnaldyq shyǵyndardy sýbsidiialaýǵa, túrli járdem tólemderine jáne basqalarǵa jumsalady. Partiianyń qalalyq filialy, «Nur Otan» fraktsiiasy máslihatta túrli áleýmettik máselelerdi kóteredi. Barlyq usynystar jergilikti atqarýshy organdarda oń sheshimin taýyp, qalada oidaǵydai júzege asýda. Mysaly, partiia fraktsiiasy usynysynyń arqasynda 2016 jyldan bastap balabaqsha tólemi 27 den 15 myńǵa tómendedi. Osy maqsatqa biýdjetten jyl saiyn 3 mlrd teńgeden astam qarjy bólinip otyr. 60 myń otbasy balabaqshaǵa az tóleitin múmkindik aldy», - dedi Baýyrjan Baibek.
Qalada sońǵy 4 jyl ishinde memlekettik tapsyrys esebinen jeke balabaqshalarda oryn sany 3 esege artyp, 4,7-den 15,5 myńǵa ósti. Jalpy, bala baqshalardyń oryndaryn sýbsidiialaýǵa jyl saiyn 18 mlrd teńgeden astam qarjy bólinedi. Bul tsifr 3 jyl ishinde 2 ese ósti. Bulardan ózge, kópbalaly otbasylardyń 11 synypqa deiingi balalary tegin tamaqtanady jáne mektep formasymen qamtamasyz etiledi. Mundai qajettilikterge jyl saiyn qala 800 mln teńgeden astam qarjy bólýde. Turmysy tómen otbasylardyń 4 myńnan astam balalarynyń tegin demalysy úshin jyl saiyn biýdjetten 230 mln teńge qarastyrylǵan.
Aita keterligi, sońǵy 4 jyl ishinde partiia usynysy boiynsha kópbalaly otbasylardyń músheleri, mektep, kolledj oqýshylary JOO stýdentteri men zeinetkerler jolaqynyń jeńildetilgen 50 paiyzyn ǵana tóleidi, buǵan jyl saiyn 5 mlrd teńgeden astam qarjy jumsalady. Jeńildikpen 350 myńnan astam adam qamtylǵan.
Partiia bastamasy boiynsha túrli ótemaqylar beriledi. Mysaly, 2,3 myń otbasynyń, onyń ishinde kópbalaly analardyń kommýnaldyq shyǵyndary tólendi. Osy kategoriiadaǵy tulǵalardyń úilerine eseptegish kommýnaldyq qondyrǵylar ornatylyp jatyr. Búgingi kúni 1000-nan astam otbasyǵa 50 mln teńgeden astam qarjylai kómek kórsetildi.
