«Nur Otan» partiiasy tóraǵasynyń birinshi orynbasary Baýyrjan Baibek Altai men Atyraý, Alataý men Arqa arasyn dúbirli dýmanǵa bóleitin Aitys alamany bastalatynyn jariia etti. Bul týraly ol óziniń Instagram paraqshasynda jazdy, dep habarlaidy "Ult aqparat".
«Aityssúier qaýymǵa jariialar súiinshi habarymyz bar. Taiaý kúnderde «Nur Otan» partiiasynyń qoldaýymen Altai men Atyraý, Alataý men Arqa arasyn dúbirli dýmanǵa bóleitin Aitys alamany bastalady. Bul - aitys dese arqasy qozyp, rýhy asqaqtaityn qazaq úshin orny bólek mereke. Sondyqtan, Táýelsizdiktiń alǵashqy sátinen-aq Elbasy ultymyzdyń uly murasyn, ozyq dástúrleri men mádeni qazynasyn túgendeýge, olardy zamanǵa sai túletip, jańǵyrtýǵa erekshe den qoidy. Halyq óneriniń órkendeýine jaǵdai jasap, daryndy jandarǵa jol ashty. Elbasynyń tikelei bastamasymen iske asyrylǵan «Mádeni mura» jobasynda, «Bolashaqqa baǵdar: Rýhani jańǵyrý», «Uly Dalanyń jeti qyry» baǵdarlamalyq maqalalarynda da ulttyq rýhani muramyzdy, qundy jádigerlerimizdi, sporttyq oiyndarymyz ben óner saiystaryn túgendep, damytýǵa erekshe mán berilgen. Elbasy negizin qalap, kóshbasshylyq jasap kele jatqan «Nur Otan» partiiasynyń doktrinasynda da qamtylǵan basty qundylyqtarymyzdyń biri – otbasy men dástúr. Onda «qazaq tilin, mádeniet pen dástúrdi damytý - bizdiń strategiialyq basymdyǵymyz» ekeni naqty kórsetilgen», - dep jazdy Baýyrjan Baibek.
«Ejelden «Bas kespek bolsa da, til kespek joq» dep, han aldynda dat aityp, erkin oiǵa erik bergen, barshaǵa birdei teńdik bergen elmiz. Sondyqtan ultymyzdyń osyndai ozyq ónerin, izgi dástúrlerin jalǵastyrý bizdi kemeldendire túsedi. Osyǵan orai partiia Tóraǵasynyń bastamasymen qaita jańǵyrýǵa kirisip, ekinshi tynysy ashylyp otyrǵan saiasi uiymymyz aitysqa airyqsha nazar aýdaryp otyr. Osy maqsatta biz partiia qoldaýymen jyl boiy jer-jerde alaman aitystar uiymdastyrýdy qolǵa aldyq. Biyldyń ózinde jyl sońyna deiin bes aitys ótkizemiz. Barshańyzdy alda ótetin osynaý arqaly aqyndardyń sóz saiysyna kelip, óreli ónerimizdi tamashalaýǵa shaqyramyn», - dep jazdy Baýyrjan Baibek.
