Energetika ministri Nurlan Noǵaev Batys Qazaqstan oblysynyń ákimdigine «Batysenergoresýrstar» JShS-niń basyndaǵy problemany tezirek sheshýdi usyndy, dep habarlaidy "Ult aqparat".
«Naryq sýbektileri arasynda bereshekterdi tólemeý jáne jinaqtaý boiynsha suraqtar bar, bul energiia óndirýshi uiymdar tarapynan tutynylǵan gaz úshin tóleýge de áser etedi. Tutynýshylardyń toptary boiynsha elektr energiiasyna arnalǵan tarifterdiń saralanýyna bailanysty kepildik berýshi retinde áreket etetin energiiamen jabdyqtaýshy uiymdardyń jumysynda birqatar másele týyndap otyr. Osyndai máselelerdiń biri – kepildik beretin jetkizýshiler men rettelmeitin energiiamen jabdyqtaýshy uiymdar arasyndaǵy tarif aiyrmashylyǵy. Saldarynan tutynýshy zańdy tulǵalar shaǵyn energiiamen jabdyqtaýshy uiymdarǵa ketip jatyr», - deidi vedomstvo basshysy Úkimet otyrysynda.
Bul jait aqyrynda «Batysenergoresýrstar» JShS-niń kepil berý qujattary boiynsha energiia óndirýshi kásiporyndar aldynda 2 mlrd teńgeden astam qaryz bolyp qalýyna ákep soqqan.
«Osynyń kesirinen «Batysenergoresýrstar» jaýapershiligi shekteýli seriktestiginiń energiia óndirýshi jáne energiia berýshi uiymdar aldyndaǵy bereshegi 2021 jylǵy 1 mamyr jaǵdai boiynsha 2 mlrd 62 mln teńgeni quraidy. Naryq sýbektileri arasyndaǵy jaǵdaidy retteý úshin Batys Qazaqstan oblysynyń ákimdigine múddeli taraptarmen bereshekti óteý kestesin jasai otyryp, elektr energiiasy naryǵy sýbektileri arasyndaǵy bereshekti azaitý jónindegi máseleni pysyqtaý qajet dep sanaimyz», - dedi Nurlan Noǵaev.
