Batys Qazaqstan oblysynda jańa munaigaz himiiasy óndirisin qalyptastyrýǵa bolady. Bul týraly «Kondensat» AQ direktorlar keńesiniń tóraǵasy, oblystyq máslihat depýtaty Farid Bahtiozin málim etti, dep habarlaidy "Ult aqparat".
Memleket basshysy Qasym-Jomart Toqaev Qazaqstan halqyna Joldaýynda: «Qazaqstannyń batys óńirleri munai-himiia keshenderin salyp, joǵary deńgeidegi qaita óńdeý isiniń jańa óndiristik tsikldaryn qurý úshin investitsiia tartatyn ortalyqqa ainalýy tiis» dep atap kórsetken bolatyn.
- Prezident aitqan osy máseleni qoldai otyryp, Batys Qazaqstandaǵy Qarashyǵanaq kenishi negizinde ony júzege asyrýdyń tolyq alǵysharttary bar. Qazir munda óndirilgen gaz eki baǵytqa jiberilýde. Birinshisi: Orynbor gaz óńdeý zaýytyna óńdeý úshin jáne oblysty otyndyq gazben qamtamasyz etý maqsatynda belgili bir bóligin keri qaitarý úshin. Ekinshisi: jer qyrtysyna keri aidaý. Shiki gazdy osy eki baǵyttan ishinara alý arqyly Batys Qazaqstan oblysynda jańa munai-gaz himiiasy óndirisin qalyptastyrýǵa ábden bolady. Ol Úkimet tolyq qoldaǵan jaǵdaida júzege asady, - deidi F.Bahtiozin.
Onyń aitýynsha, «Kondensat» AQ mamandary Qarashyǵanaqtyń shiki gazyn óńdep, birinshi kezeńde polietilen jáne suiytylǵan gaz óndirisin qurý, al ekinshi kezeńde polipropilen óndirý boiynsha tehnologiialyq jáne qurylysqa qatysty kerek-jaraqty jasap shyǵardy.
Osy oraida qajettiligine qarai atalmysh joba aiasynda mynandai ózge de óndiristerdi uiymdastyrýǵa bolady: birinshisi, etilenglikol – jeńil ónerkásipte sintetikalyq jip alýǵa qajetti asa baǵaly shikizat. Ekinshisi, etiltrebýtil efir EBTE, izomerizat S5+ nemese alkilat – motor maiyna joǵary sapaly qospa. Odan soń aýtokólikke arnalǵan joǵary sapaly propan.
F.Bahtiozinniń sózine qaraǵanda, atalǵan joba aiasynda 1 mlrd tekshe metr Qarashyǵanaqtyń shiki gazy bólinetin bolsa, oblys jyl saiyn 100 mln AQSh dollarynan kem emes kólemde salyq túsimin túsiredi, 1 myń jańa jumys orny ashylady.
Taǵy bir aitatyn jait, Memleket basshysy óz Joldaýynda monoqalalardy qoldaý qajettigin atap ótti. Bórli aýdanynda osyndai óndiristi uiymdastyrý, Qarashyǵanaq kenishin igerýshi operator – «QPO b.v.» kompaniiasynyń qyzmetin qosa alǵanda, sóz joq, Aqsai qalasynyń damýyna qosymsha qarqyn qosary anyq.
Prezident usynysynyń mańyzdylyǵy sol, osy óndiris negizinde ózge de kóptegen qanattas óndiristerdi, tutas bir klasterdi damytýǵa jol ashylady. Mysaly, polimerlerge jatatyn plastmassadan kez kelgen buiymdardy jasaýǵa bolady. Iaǵni kádimgi qalam men shelekten bastap, keme qurastyrý men aviatsiialyq asa kúrdeli buiymdardy óndirý múmkindigi týady. Kúni búgin Batys Qazaqstan oblysynda ornalasqan, eldegi jalǵyz plastik qubyr óndiretin iri kásiporyn «Oral saýda-ónerkásip kompaniiasy» JShS qajetti shikizatty Reseiden importtaýǵa májbúr.
Jańa joba jeńil ónerkásipti, naqty aitqanda, kiim óndirisin damytýǵa járdemdesedi. Joǵaryda aitylǵan aýtokólik janarmaiyna joǵary sapaly qospalar óndirý, kólikti ózimizdiń suiytylǵan gazben qamtý da óńirdiń órkendeýine yqpal etedi. Munyń barlyǵy jańa jumys oryndaryn ashady.
«Himiia ónerkásibinde Qarashyǵanaqtyń shiki gazyn óńdeý kezinde bólingen otyndyq ilespe gaz da oblystyń óz qajetine jaratylyp, bul óz kezeginde jergilikti tutynýshylarǵa beriletin gaz baǵasyna oń áserin tigizeri anyq. Ras, ol jaǵdaida jobaǵa bólinetin shiki gazdyń kólemin az-kem ulǵaitý qajet. Degenmen ol bizdiń ekonomikalyq qaýipsizdigimizdi nyǵaitady.
Shikizatty bólý máselesin shesher bolsaq, bizdiń munai óńdeý zaýytynyń mysalynan da kórinip turǵandai, atalmysh jobany júzege asyrý arqyly biz Memleket basshysynyń tapsyrmasyn is júzinde oryndai alamyz. Eń bastysy, oblys, tutas el ekonomikasynyń ósýine, azamattardyń ál-aýqatynyń artýyna naqty qol jetkizemiz», dep túiindedi oiyn F.Bahtiozin.
