Oblys ákimi Ǵali Esqalievtiń Facebook-tegi paraqshasynda málim etkenindei, toi ótkizýge niettiler áli de bar.
«Keshe kóshede bir jas jigit jaqyndap, úilený toiyn ótkizýge ruqsat surady. Toiǵa kóp adam shaqyrmaimyz, qonaqtar sany 30 adamnan aspaidy dedi. Men nege toi-tomalaqtar ótkizýge bolmaitynyn túsindirdim, ol bárin uqqandai bolyp ketti. Aitaiyn degen oiym, bizdiń aramyzda keibir adamdarǵa toilar men sadaqalar týysqandary men dostarynyń densaýlyǵynan mańyzdy bolyp otyr», dep jazdy óńir basshysy.
Oblys aýdandarynda 5-17 shilde aralyǵynda monitoringtik toptar kópshilik is-sharalardy ótkizýge tyiym salý erejelerin buzǵan turǵyndardy anyqtady.
Ákimniń keltirgen derekterine qaraǵanda, Jánibek aýdanynda (Jánibek aýyly, Borsy aýyly), Terekti aýdanynda (Fedorov aýyly, Abai aýyly), Jańaqala aýdany Jańaqala aýylynda 50 adamǵa deiin jinalǵan úilený toilary ótken. Uiymdastyrýshylar men toi ielerine 1,5 million teńge kóleminde aiyppul salyndy.
Osy aýdandarda koronavirýstyń taralý qaýpi bar. Sondyqtan atalǵan aýdandar turǵyndary jerlesterinen osyndai sharalardy ótkizbeýdi talap etýi tiis. Eger toilar men sadaqalar jalǵasa beretin bolsa, onda bul aýdandardaǵy jaǵdai kúrdelene túsedi. Onsyz da óńirde dárigerler men medbikeler tapshylyǵy áli de bar.
Ǵ.Esqaliev sonymen qatar keibir aýdandarda, aýyldyq jerlerde oń ózgerister bar ekendigin jetkizdi.
Jaqynda oblys basshysy Tasqala aýdanynda issaparmen bolǵan kezinde dárigerler aýdandyq aýrýhanaǵa keletin naýqastar sany azaiǵanyn atap ótken. Búginde aýdanda 3 jyljymaly meditsinalyq top qurylǵan. Olardyń belsendi jumystarynyń arqasynda qońyraýlar sany 3 ese kemigen. Mysalǵa, bir apta buryn 35 qońyraý túsken bolsa, búgingi kúni 11 qońyraýǵa deiin kemigen.
Sondai-aq aýdandyq aýrýhananyń dárigerleri Telegram messendjerinde top ashyp, aýdan turǵyndaryna onlain-keńester ótkizip jatyr. Jergilikti kásipkerler men oblystyń belsendi azamattarynyń esebinen kórshiles Saratov oblysynan aýdandyq aýrýhanaǵa qosymsha dári-dármekter satyp alynǵan. Statsionarlyq jáne ambýlatoriialyq em alýshylar tegin dári-dármektermen qamtamasyz etilgen. Barlyq aýyldyq okrýgterge dári-dármekterdi arnaiy meditsina qyzmetkerleri jetkizip júr. Oǵan qosa pandemiia kezinde aýyldyq okrýg turǵyndary dári-dármekterdi aýdan, oblys ortalyqtaryna barmai-aq, aýyldyq FAP arqyly tapsyrys berip ala alady.
«Eń bastysy, aýdan halqy qazirgi jaǵdaidy jaqsy túsinip, toi-tomalaqtardy ótkizbeý týraly sheshim qabyldaǵan. Tártipke baǵyný arqyly tasqalalyqtar burynǵy ómir yrǵaǵyna tez keledi dep senemin. Ókinishke qarai, oblys aýdandarynda epidemiologiialyq jaǵdai ártúrli. Barlyq aýdan qalypty ómir yrǵaǵyna qaita oralýy úshin bárimiz jaýapkershilikti arttyrýymyz qajet. Qarym-qatynasty azaitý arqyly týystarymyz ben dostarymyzdyń ómirlerin saqtap qalamyz. Sonda ǵana bizde naýqastar sany azaiady. Bul bizderdiń dárigerlerge kórsetken úlken kómegimiz bolady», dep túiindedi oiyn oblys ákimi.
