Batys Qazaqstan oblysynda sońǵy aptada koronavirýs juqtyrý deńgeii 20,5 paiyzǵa ósti, dep habarlaidy "Ult aqparat".
BQO sanitarlyq-epidemiologiialyq baqylaý departamenti basshysynyń orynbasary Nurlybek Mustaev óńirlik kommýnikatsiialar qyzmeti alańynda málim etkendei, aldyńǵy aptada oblysta 519 adam tirkelse, 26 naýryz – 1 sáýir aralyǵynda 653-ke jetti.
Sońǵy táýlikte koronavirýs juqtyrǵandar sany (104) júzden asyp ketti.
Nurlybek Ermekulynyń aitýynsha, 1 naýryzdan beri 2242 adam tirkeldi. Sonyń 1002-sinen (44,6 paiyzy) JRVI belgileri boiynsha tekserilgende anyqtalsa, 732-si (32,6 paiyzy) buryn aýyrǵandarmen qarym-qatynasta bolǵan.
399-y (17,7 paiyzy) profilaktikalyq maqsatta qaralǵanda, 109-y (4,8 paiyzy) statsionarǵa jatqyzar aldynda synama alynǵanda, virýs juqtyrǵany belgili boldy.
Sondai-aq osy kezeńde KVI juqtyrǵandarmen bailanysta bolǵan 4396 adam meditsinalyq baqylaýǵa alyndy.
Aýyrǵandardyń 787-si (35,1 paiyzy) – jumys jasaityndar, 600-i (26,7 paiyzy) – zeinetkerler, 453-i (20,2 paiyzy) – jumyssyzdar, 162-si (7,2 paiyzy) – oqýshylar, 66-sy (2,9 paiyzy) – meditsina qyzmetkerleri, 68-i (3 paiyzy) – muǵalimder.
«Oblysta oqý jyly bastalǵannan beri barlyǵy 636 oqýshydan koronavirýs anyqtaldy. Sonyń ishinde úshinshi toqsanda 11 qańtardan beri 421 oqýshynyń (243-i dástúrli formatta, 178-i qashyqtan bilim alady) aýyrǵany belgili boldy. Qala men aýdandardyń bas memlekettik sanitarlyq dárigerleriniń qaýlysymen eki mektepte 4 synyp, tórt balabaqshada 4 top, 1 JOO-da eki, 1 orta arnaýly bilim beretin mekemede bir top karantinge jabyldy», dedi N.Mustaev.
Naýryz aiynyń basynan beri monitoringtik toptar 642 reid júrgizip, 5976 nysandy qamtydy. Tórt nysanda karantin talabyn buzýshylyq anyqtaldy. 26 hattama toltyrylyp, 1,7 mln astam teńge kóleminde aiyppul salyndy.
