QR Aqparat jáne qoǵamdyq damý ministri Dáýren Abaev «Nur Otan» partiiasynda qoǵamdyq qabyldaý ótkizdi, dep habarlaidy QazAqparat tilshisi.
Batys Qazaqstan oblysynan beinebailanys arqyly habarlasqan Tabyldy Masatov Jańaqala aýdanyndaǵy Qyzyloba aýylynyń máselesin kóterdi.
«Men úlken kisilerdiń atynan kelip otyrmyn. Bizdiń Qyzyloba aýylymyzda kózi múldem kórmeitin qariialar kóp, kózi nashar kóretin ájelerimiz bar. Solardyń suraýy boiynsha «Qazaq radiosy» máselesin kótergim keledi. Olar teledidar kóre almaidy, jańalyq tyńdai almaidy. Qazaq radiosy joq. Osyny sheship berseńiz», - dedi T.Masatov.
QR Aqparat jáne qoǵamdyq damý ministri Dáýren Abaevtyń aitýynsha, ondai másele basqa aimaqtarda da bar. Ony Keńes zamanynda da sheshe almaǵan. Búginde ministrlik osy másele boiynsha tiisti sharalardy bastap ketti.
«Máselen, byltyr biz Almaty men Túrkistan oblystarynda radio taratý qurylǵysyn ornatyp, osy problemany tolyǵymen sheshtik. Endi siz aitqannan keiin Batys Qazaqstan oblysyn da qolǵa alatyn bolamyz. Osy bir-bir jarym jyldyń ishinde atalǵan máseleni sheship beremiz dep oilaimyn», - dedi D.Abaev.
