Batys Qazaqstan oblysynda koronavirýsqa qatysty jaǵdai kúrdeli kúiinde qalyp otyr. Bul týraly brifingide oblys ákimi Ǵali Esqaliev málim etti, dep habarlaidy "Ult aqparat".
Qazirgi tańda óńirde 940 adam (571-i juqpaly aýrýlar, 369-y provizorlyq aýrýhanada) em alýda. Sonyń ishinde 473 adamnyń jaǵdaiy ortasha bolsa, 92 adam aýyr halde.
BQO-da indet jalpy 3600 adamnan anyqtalǵan bolatyn. Dertke shaldyqqandardyń 61,1 paiyzy Oral qalasynda – 2100 adam. Sondai-aq Bórli aýdanynda 223, Báiterekte 208, Aqjaiyqta 141 adam tirkeldi.
Ákimniń sózine qaraǵanda, 1 sáýirde óńirde 380 tósek-oryn bolǵan edi. Indettiń órshýine bailanysty olardyń sany 3 ese derlik, 1125-ke deiin ulǵaityldy. Jýyrda oblystyq jáne qalalyq kópbeiindi aýrýhanada taǵy 230-dei oryn ashylmaq.
Kúni búgin 130 jasandy tynys alý apparaty bar. Málim etilgendei, bul – óńirge jetkilikti. Alaida, ottegi kontsentratorlary boiynsha tapshylyq bar. Qazirgi tańda naýqastardy emdeýde 46 ottegi kontsentratory qoldanylýda. Demeýshiler qarjysy esebinen kontsentratorlar alýǵa tapsyrys berildi, taiaý arada jetkiziledi. Bobrov apparaty da ákelinedi. Sonymen qatar oraldyq kásiporyndardyń birinde Bobrov apparaty shyǵaryla bastamaq.
«Qazirgi tańda meditsina kadrlarynyń jetispeýshiligi ótkir máseleniń biri bolyp otyr. Eń aldymen, kishi jáne orta meditsina mamandary jetispeýde. Indetpen kúreske meditsina qyzmetkerleri jalpy sanynyń tek 50 paiyzy ǵana jumyldyrylǵan. Meditsina qyzmetkerleriniń kóbi aýrýǵa shaldyqqan nemese májbúrli demalysqa ketken. Osy máseleni sheshý úshin 2 meditsinalyq kolledj túlekterin aýrýhanalarda jumys isteýge jedeldetip oqytý jumystary bastaldy. 15 kúnnen soń dárigerlerge 200-ge jýyq jańa meditsinalyq qyzmetker kómekke keledi. Sonymen qatar biz basqa qalalardan joǵary meditsinalyq oqý oryndarynyń túlekterin tartýdy josparlap otyrmyz. Sondai-aq jeke meditsinalyq klinikalardan 9 dáriger áriptesterine kómektesýge kelisti», dedi óńir basshysy.
Oblys ákimi sońǵy aida virýsqa qarsy jáne qyzýdy túsiretin dári-dármek jetkizilimi 5 ese óskenin jetkizdi. Kúni búgin quramynda paratsetamol bar dári-dármekter, atsetilsalitsil qyshqyly, tseftriakson, azitromitsin, askorbin qyshqyly, virýsqa qarsy dáriler jetkilikti. Al paratsetamol, leovfloksatsin jáne antikoagýliant jetispeýde.
«Memleket basshysy Qasym-Jomart Toqaevtyń tapsyrmasyna sáikes dári-dármekti satýda alypsatarlyqty anyqtai bastadyq, dárihanalarda baǵany baqylaýdamyz. Monitoringtik top birqatar dárihana ieleri tarapynan buzýshylyqty anyqtady. Barlyq materialdar aiyppul salý úshin oblystyq taýarlar men kórsetiletin qyzmetterdiń sapasy men qaýipsizdigin baqylaý departamentine jiberildi. Dárihanalar baǵany ósirmeýi tiis. Dári-dármek boiynsha shektik baǵany www.dari.kz. saity arqyly qaraýǵa bolady», dedi Ǵ.Esqaliev.
