Batys Qazaqstan oblysynda qasqyrdyń malǵa shabýy jiilep ketti, dep habarlaidy QazAqparat agenttigi.
Oblys ortalyǵynan eń shalǵaida ornalasqan Bókei ordasy aýdanynda qasqyr mal baqqan sharýalar úshin bas aýyrtar máselege ainaldy.
Han ordasy aýyldyq okrýgindegi «Bereke» sharýa qojalyǵynyń basshysy Erkin Jabasovtyń aitýynsha, sońǵy eki-úsh jylda qasqyr aýlanǵan joq. Sonyń saldarynan olardyń sany kóbeiip otyr.
«Qazirgi tańda malshylarda myltyq joq. Kún saiyn bir bas maldy «jamanaýyz» áketip jatyr. Jyl saiyn qulynnyń elý paiyzy it-qusqa jem bolady. Buryn qysta qarshanamen aýlaityn edi, ol da tyiyldy. Eńbegin tólep, túz taǵysyn aýlatatyn qasqyrshy da joq qazir. Jiyndarda osy máseleni aitýdai-aq aityp júrmiz, biraq nátije joq», dedi Jabasov.
Uialy aýyldyq okrýginiń ákimi Erlan Ermekqalievtiń sózine qaraǵanda, sońǵy on-on bes kúnde qasqyrdyń malǵa aýyz salýy jiiledi.
Okrýgte 62 sharýa qojalyǵy bolsa, solardan kúnine 4-5 bas buzaýdy jep ketip jatyr degen habar túsedi.
«Bir ańshyǵa úsh qasqyr aýlaýǵa bolady degen limit bar, bizdińshe, sonyń sanyn kóbeitý kerek», dedi aýyl ákimi.
BQO orman sharýashylyǵy jáne janýarlar dúniesi aýmaqtyq inspektsiiasynyń bas mamany Arman Izimǵalievtiń málim etkenindei, bir jylǵa 196 bas qasqyrdy aýlaýǵa limit belgilengen. Kúni búginge deiin Egov portaly arqyly 186 bas bórini atýǵa ruqsat berildi. Endi biyl 10 bas qasqyrdy ǵana atýǵa ruqsat qaldy.
«Ańshylarda arnaiy kýáligi, tirkelgen myltyǵy bolýy kerek. Ár ańshyǵa 3 qasqyrdy atýǵa ruqsat beriledi. Eger túz taǵysynyń sany kóbeise, limit sany kelesi jyly artady», dedi Izimǵaliev.
