Batys Qazaqstan oblysynda karantindik shekteý sharalary jeńildetildi. Bul týraly BQO taýarlar men kórsetiletin qyzmetterdiń sapasy men qaýipsizdigin baqylaý departamentiniń basshysy Muhamǵali Aryspaev brifingte málim etti, dep habarlaidy "Ult aqparat".
Onyń aitýynsha, bul sharalar kezeń-kezeńmen júzege asyrylatyn bolady.
Sonymen qatar karantindik sharalar 25 mamyrǵa deiin saqtalady.
Birinshi kezeńde, iaǵni 12 mamyrdan bastap aýdanaralyq blokposttar alynady. Reseimen jáne kórshiles oblystarmen shekarada, Oral qalasy men Bórli aýdanynda qoiylǵan blokposttar ǵana qalady. Turǵyndardyń araqashyqtyqty saqtai otyryp, skverler men jaǵajailarda serýendeýine ruqsat beriledi.
Sondai-aq óńirdegi barlyq azyq-túlik bazarlary ashylyp, tańǵy saǵat 09.00-den 16.00-ge deiin jumys istei alady. Alaida olarda barlyq sanitarlyq-dezinfektsiialyq talaptar qatań saqtalýy tiis. Bazarǵa kelýshiler, satýshylar maska, qolǵap kiiýi kerek.
Sol sekildi halyqqa qyzmet kórsetý ortalyqtary da jumys istei bastaidy. Munda da sanitarlyq talaptar saqtalyp, qyzmet kórsetý ornyna bes adamnan artyq kirmeýi qajet.
Biznes ortalyqtary men olardyń ofisteri jumystaryna kirisedi.
Koronavirýstyń ósý deńgeii 5 paiyzdan aspaǵan jaǵdaida 18 mamyrda alańy 2 myń sharshy metrdi quraityn iri saýda ortalyqtary men azyq-túliktik emes taýarlar satatyn bazarlardy da ashý kózdelýde. Monitoringtik toptyń tekserýinen keiin barlyq talaptyń saqtalýymen balabaqsha mekemeleri de búldirshinderdi qabyldai alady.
Al ósý deńgeii 2 paiyzdan aspaǵan jaǵdaida fitnes ortalyqtary, monsha, meiramhana, qoǵamdyq tamaqtandyrý oryndaryna kezek keledi.
Sanitarlyq talaptarǵa sáikes áýe reisteri de birtindep qalpyna keledi, bul rette ushatyn adamdar test tapsyrmaidy.
«Oblysta jaǵdai áli de turaqsyz. Ásirese, Reseiden, Teńiz ken ornynan kelgender arasynan aýrýdyń jii anyqtalýy alańdatyp otyr. Meditsina mekemelerimen, oblystyq densaýlyq saqtaý basqarmasymen birge osyny tómendetý, naýqastardy emdeý, indettiń aldyn alý baǵytyndaǵy jumystar jalǵasýda», - dedi M.Aryspaev.
