Batys Qazaqstan oblysynda gýmanitarlyq kómek berý isi jalǵasýda. Bul týraly óńirlik jedel shtab otyrysynda aityldy, dep habarlaidy "Ult aqparat".
Oblysqa kelgen gýmanitarlyq kómekti qabyldaý jáne bólý jónindegi komissiia hatshysy Gúljaina Bisenǵalieva málim etkendei, 29 sáýir men 22 shilde aralyǵynda jeti lek gýmanitarlyq kómek jetkizilgen.
Atap aitqanda, Qytai, Úndistan, Pákistan, Túrkiia, Japoniia, Birikken Arab Ámirlikteri, Resei, AQSh elderinen, 3 halyqaralyq kompaniia, 8 JShS, 2 jeke qor, barlyǵy 26 demeýshiden kelgen 7434 meditsinalyq qorǵanys kostiými, 85 042 maska, 70 ýltraqyzyl termometr, 160 ottegi kontsentratory, 400 pýlsoksimetr, 200 respirator, 78 395 býma 35 túrli dári-dármek jáne sanitaizer men dezinfektsiialyq zattar óńirdegi emdeý mekemelerine taratylǵan.
Sol sekildi 22 shilde kúni Dúnijúzilik densaýlyq saqtaý uiymynan 25 myń qorǵanys betperdesi, 3600 qorǵanys kózildirigi, 6 700 meditsinalyq halat, 18 myń meditsinalyq betperde, 51 myń respiratorlyq betperde kelgen. Túrkiia elinen kelgen qorǵanys quraldary men dári-dármekter de qabyldandy. 28 shildede «BI Group» kompaniiasy men «Shuǵyla» qoǵamdyq qory birlesip alǵan 200 dana ottegi kontsentratory oblys aýrýhanalaryna bólindi.
29 shilde kúni jeke azamat Murat Muhambetovtiń demeýshiligimen 30 dana Bobrov apparaty men 12 dana SRAR betperdesi de aýrýhanalarǵa berildi.
«Aldaǵy kúnderi Qytai, Ýkraina, Ońtústik Koreia, Izrail, Mońǵoliia, Majarstan, Birikken Arab Ámirlikterinen gýmanitarlyq kómek kelmekshi», dedi G.Bisenǵalieva.
Beinebailanys arqyly ótken otyrys barysynda oblystyq densaýlyq saqtaý basqarmasynyń basshysy Bolatbek Qaiýpov qazirgi tańda meditsinalyq mamandardyń qatary JOO men kolledjder túlekteri esebinen tolyǵyp jatqanyn jetkizdi. Óńirde 774 meditsina qyzmetkeri koronavirýspen aýyrsa, sonyń 477-si jazylyp shyqqan.
Oblys ákiminiń orynbasary Serik Egizbaevtyń aitýynsha, aldyńǵy shepte júrgen meditsina qyzmetkerleriniń densaýlyǵyn nyǵaitý maqsatynda tiisti jumystar jasalýda.
Oral qalasynyń ákimi Abat Shynybekov oblys basshysynyń tapsyrmasyna sáikes 20 monitoring tobynyń karantin kezindegi tártiptiń saqtalýyn qadaǵalaýdy kúsheitkenin jetkizdi. Sonyń nátijesinde 8 zańdy tulǵaǵa, 74 turǵynǵa qatysty ákimshilik is materialdary sotqa joldandy. Sanitarlyq talaptyń saqtalmaýyna bailanysty «Mirlan» bazaryndaǵy kóterme saýda oryndary «El yrysy» bazary aýmaǵyna kóshirilgen bolatyn.
Qazirgi tańda Zachagan kentindegi mamandandyrylǵan HQO janynan taǵy bir kóterme saýda ornyn ashý máselesi oilastyrylýda. Osyǵan orai oblys ákimi Ǵali Esqaliev Terekti aýdany basshysyna Oralǵa tiip turǵan Podstepnyi aýylynan taǵy bir kóterme saýda ornyn ashýdy tapsyrdy. Sonymen qatar karantin sharalaryn saqtaý baǵytyndaǵy basqa da sharalar jalǵasady.
BQO bas memlekettik sanitar dárigeri Muhamǵali Aryspaevtyń sózine qaraǵanda, karantin rejimin buzǵandarǵa qatysty 171 ákimshilik hattama toltyrylyp, 11 mln teńge aiyppul salynǵan. Bulardyń kópshiligi – túnde mezgilsiz júrgender. Sondai sebeppen 131 adam jaýapqa tartyldy.
Sol sekildi shashtaraz, saýna, meiramhana siiaqty oryndarda 17 zańbuzýshylyq anyqtalyp, ielerine 3 mln astam teńge aiyppul salyndy. Ókinishke qarai, óńirde túrli kópshilik jiyndar tyiylmai tur.
Sonyń ishinde 5 shildeden beri 12 úilený toiynyń ótkizilgeni belgili boldy.
