Batys Qazaqstan oblysynda kiikter jol salýshylar qazǵan transheiaǵa túsip ketti, dep habarlaidy "Ult aqparat".
Qazylǵan orǵa qulaǵan janýarlardyń videosy 15 qyrkúiekte áleýmettik jelide paida boldy. Kadrdan onnan astam kiiktiń shuńqyrdan shyǵa almai, ary-beri sabylyp júrgenin kórýge bolady.
BQO orman sharýashylyǵy jáne janýarlar dúniesi aýmaqtyq inspektsiiasynan túsken málimetke qaraǵanda, oqiǵa Jánibek aýdanynda bolǵan.
14 qyrkúiek kúni shamamen saǵat 10.00-de «WhatsApp» jelisi boiynsha inspektsiia qyzmetkerine videotúsirilim kelip túsken. Onda shamamen 12-15 bas kiiktiń (negizinen tekeleri) tereńdigi 2,5-3 metr, uzyndyǵy 700-800 metr transheiada júrgeni beinelengen.
Jánibek aýdanyna inspektsiia qyzmetkeri shuǵyl attanyp, «Ohotzooprom» ÓB» RMQK Batys Qazaqstan aimaqtyq filialynyń inspektorlarymen birlesip, oqiǵany anyqtady.
Videony 11-12 qyrkúiek kúnderi Kaztalov-Jánibek avtojoly boiynda qurylys-jóndeý jumystaryn júrgizip jatqan «Temirjol jóndeý» - «SpetsStroiMontaj» JShS filialynyń qyzmetkerleri túsirgen.
Kiikter atalǵan joldy kesip ótken kezde qorshaýdyń joqtyǵynan transheiaǵa túsip ketip, shyǵa almaǵan. Sodan keiin arnaiy tehnikanyń kómegimen topyraq sebilip, aq bókender bosatylǵan.
«Atalǵan aýmaq Batys Qazaqstan oblysyndaǵy kiikterdiń kóship-qonyp júretin jeri bolyp esepteledi. Sondyqtan «Temirjol jóndeý» - «SpetsStroiMontaj» JShS filialy basshylyǵyna aldaǵy ýaqytta mundai jaǵdaiǵa jol bermeý qajettigi eskertildi», dep málimdedi BQO orman sharýashylyǵy jáne janýarlar dúniesi aýmaqtyq inspektsiiasy.
«Temirjol jóndeý - «SpetsStroiMontaj» JShS filialynyń qyzmetkerleri atalǵan oqiǵadan kiikterge zalal kelmegenin, arnaiy tehnikanyń kómegimen shyǵaryp jibergenin rastady.
