Batys Qazaqstan oblysynda Altyn Orda dáýirine jatatyn kesene tabyldy, dep habarlaidy QazAqparat.
BQO tarihi-ólketaný mýzeiiniń direktory Mirbolat Ersaevtyń málim etkenindei, kesene Terekti aýdany aýmaǵynda Shalqar kóli mańynda oryn tepken.
Onyń sózine qaraǵanda, bastapqyda oǵan Shalqar ataýy berildi. Keiinirek arheologiialyq qazba jumystaryn júrgizý jáne jergilikti halyqqa saýalnama júrgizý kezinde sol jerdiń ataýy boiynsha Jańabai dep ataldy.
Qundylyǵy joǵary keseneni mýzeidiń tarih jáne arheologiia bóliminiń ǵylymi qyzmetkeri, jasaq basshysy Iana Luqpanova tapty.
Keseneniń jer qazý jumystary qolmen júrgizildi. Úiindini zertteý barysynda sáýlet qurylymynyń barlyq anyqtalǵan elementteri men tabylǵan artefaktilerdi tazartý, fotofiksatsiia jumysy atqaryldy.
Iana Luqpanovanyń aitýynsha, kólemi 25h25 sm, qalyńdyǵy 6 sm bolatyn kólemdegi kúidirilgen kirpishten salynǵan kesene Altyn Orda kezeńine jatady.
Ǵimarattyń ózi tórtburyshty pishindi, syrtqy ólshemi boiynsha qabyrǵalardyń uzyndyǵy 7-den 8 metrge deiin, soltústik-batys jaǵyndaǵy qabyrǵalardyń qalyńdyǵy 1,6 metr, shiki kirpishten 7 qatarǵa búktelgen, eki jaǵynan kúidirilgen kirpishpen qaptalǵan. Shyǵys qabyrǵasy nashar saqtalǵan, onyń shetteri qiraǵan.
«Qazba jumysy barysynda tabylǵan adamnyń súiegin er adamnyń qańqasy dep boljam jasap otyrmyz. Jasyn anyqtaý múmkin bolmady, árine, onymen antropologtar jumys isteidi. Jergilikti turǵyndar birneshe jyl boiy jerleý ornyn ashýǵa tyrysqandyqtan, qańqanyń zaqymdalǵany kórinip tur. Qundylyqtardy izdegen kezde qaldyqtardan basqa karnel monshaǵyn taptyq. Birden aitaiyn, dál osyndai zattar orta ǵasyrǵa tán basqa jerleý oryndarynan da tabylǵan. Ádette, karnel monshaqtary júrek, bilek aimaǵynda jatady. Astrahandyq arheolog Viacheslav Vasilevich Plahovtyń boljamyna qaraǵanda, sol kezdiń adamdary karnel monshaqtaryn aýyrǵan jerlerine qoiǵan. Sebebi, karneldiń sýlanǵan jarany tez qurǵatyp, jazatyn qasieti málim. Emdeý kezinde qyzdyrylǵan karnel bólikterin qoldanýdyń arqasynda qabyný azaiyp, jaranyń tez bitip ketetindigin sol kezdiń adamdary da bilgen bolyp tur», - dedi Iana Luqpanova.
Eske sala keteiik, Qazaqstannyń kieli oryndarynyń qataryna engizilgen Taqsai hanshaiymy jerlengen qorǵan kesheni de osy Terekti aýdany Dolinnyi aýyly mańynda ornalasqan. Ol 2012 jyly tabylyp, keiin «Altyn hanshaiym» qalpyna keltirilip, elordadaǵy QR Ulttyq mýzeiine qoiyldy.
Taqsai hanshaiymynyń basyna aq kesene ornatyldy.
