Batys Qazaqstan oblysynda 3 myńnan astam meditsina qyzmetkeri koronavirýsqa qarsy ekpe saldyrdy, dep habarlaidy "Ult aqparat".
BQO densaýlyq saqtaý basqarmasy basshysynyń orynbasary Gúlnár Ábdirahmanova óńirlik kommýnikatsiialar qyzmeti alańynda ótken brifingide málim etkendei, osy ýaqytqa deiin óńirge 9500 doza vaktsina jetkizilse, sonyń 5250-i – birinshi, 4250-i – ekinshi komponent.
Gúlnár Maqsotqyzynyń sózine qaraǵanda, kúni búginge deiin 5243 adam birinshi komponentpen (99,9 paiyz) egilip úlgerdi. Sonyń 3027-si nemese 57,7 paiyzy – meditsina qyzmetkerleri, 1222-si (23,3 paiyzy) – pedagogtar, 275-i (5,2 paiyzy) – quqyq qorǵaý organdarynyń qyzmetkerleri, 719-y (13,8 paiyzy) – basqa adamdar.
«Vaktsinatsiia keste boiynsha júrgizilýde. Aldymen koronavirýs juqtyrý deńgeii joǵary sala ókilderi ekpe alýda. Ár kezeń tolyq qamtylǵan saiyn halyqtyń qalǵan bóligine kezek keletin bolady», dedi G.Ábdirahmanova.
Osy kezge deiin óńirde 15250 adam indet juqtyrsa, sonyń 12367-si nemese 81,1 paiyzy jazylyp shyqty.
Oblysta 241 adam kóz jumdy. Jyl basynan beri 73 adam (qańtarda – 28, aqpanda – 15, naýryzda – 30) qaitys bolsa, sonyń 39-y – áielder, 34-i – erler. 61-i qalada, 12-si aýdandarda ómirden ozdy.
Qazirgi tańda 195 tósektik 4 karantindik statsionarda 11 adam emdelýde. Al 696 tósektik 9 infektsiialyq statsionarda jatqandar sany 410-ǵa jetti. Sonyń ishinde 22-si jansaqtaý bólimshesinde em alýda.
«Aýrýdyń alǵashqy belgileri baiqalǵan boida eshqaida barmai, úige dárigerdi shuǵyl shaqyrtý kerek. Óitkeni emhanalarda kezek kútkende, kóshede infektsiiany basqa adamdarǵa juqtyrý qaýpi joǵary. Sondai-aq ózi qosymsha aýrý jamap alýy múmkin. Bul derttiń asqynýyna, tipti ólimge soqtyrýy yqtimal. Betperde rejimin, áleýmettik araqashyqtyqty saqtap, adamdar kóp jinalatyn qoǵamdyq oryndarǵa barýdan aýlaq bolyp, sonymen qatar ózge qalalarǵa sapar shegýdi toqtata turý qajet», dedi Ábdirahmanova.
