Batys Qazaqstan oblysynda ótken jyly 2652 dana kiik múiizi tárkilendi, dep habarlaidy "Ult aqparat".
BQO orman sharýashylyǵy jáne janýarlar dúniesi aýmaqtyq inspektsiiasynyń basshysy Qairat Qadeshevtiń óńirlik kommýnikatsiialar qyzmeti alańynda málim etkenindei, óńirde kiikter Bókei ordasy, Jánibek, Qaztalov, Jańaqala, Tasqala jáne Aqjaiyq aýdandarynyń jerin mekendeidi.
Qairat Temirǵaliulynyń sózine qaraǵanda, 2019 jylǵy sońǵy sanaq oblysta kiik sany 217 myńǵa jetkendigin kórsetti. 2020 jyly indetke bailanysty josparly sanaq júrgizilgen joq. Biyl sanaqty sáýir aiynda ótkizý josparlanyp otyr. Monitoring boiynsha kiik sanynyń qarqyndy túrde ósip kele jatqany baiqalady.
Kiikti aýlaýǵa, onyń bólikterimen ainalysýǵa 2023 jylǵa deiin tyiym salynǵan.
Ótken jyly kiikti aýlaýǵa jáne onyń bólikterimen zańsyz ainalysýǵa bailanysty 44 qylmystyq is qozǵalyp, 2019 jylǵydan (26) edáýir ósti. 9 qylmystyq is sotta qaralyp, 10 adam qylmystyq jaýapkershilikke tartyldy. Sonyń ishinde eki adam 6,6 jylǵa bas bostandyǵynan aiyryldy. 1 qylmystyq is toqtatyldy. Qalǵan ister boiynsha tergeý amaldary jalǵasýda.
Quqyq buzýshylardan 2652 dana múiizge qosa atylǵan 491 kiik ushasy tabyldy. Sondai-aq 8 avtokólik, 2 qarshana, 2 mototsikl jáne 9 atys qarýy tárkilendi. Sotpen 62,5 mln astam teńge óndirildi.
Sońǵy jyldary kiiktiń jaiylymdyq jáne shabyndyq jerlerdi otap ketetini jóninde turǵyndardan aryz-shaǵymnyń jiilegeni belgili.
Buǵan bailanysty inspektsiia basshysy kiik sanynyń rettelýi bolashaqtyń enshisinde ekendigin, ǵylymi negizde sheshim qabyldanatynyn jetkizdi.
«Bókeiorda» tabiǵi rezervatyn qurýǵa bailanysty aitarym, bul jaǵynan Batys Qazaqstan oblysy kenje qalyp otyr. 2013 jyly tehnikalyq-ekonomikalyq negizdeme jasalǵanymen, zańdy tulǵa áli belgilengen joq. Qazirgi kezde munymen ýákiletti organ – Orman sharýashylyǵy jáne janýarlar dúniesi komiteti tikelei ainalysýda. Qujattar tiisti organdarmen kelisilýde. Brakonerlerden tárkilengen múiizderdi paidaǵa asyrý jaǵy qarastyryla ma? degen saýalǵa orai munyń mańyzdy másele ekendigin aitqym keledi. Keibir normativter bir-birine qaishy keledi. Árine, kiik múiizderinen biýdjetke zańdy túrde tabys tússe, ol utymdy bolar edi. Bul máselemen de atalǵan komitet shuǵyldanýda», dedi Q.Qadeshev.
