Batys Qazaqstan oblysy Tasqala aýdany Dostyq aýyldyq okrýginiń ákimi itterdi pnevmatikalyq myltyqpen atyp jatqany videoǵa túsip qalǵan. Áleýmettik jelige taraǵan video, qyzý talqyǵa tústi, - dep habarlaidy Tengrinews.kz.
Videodan qolynda qarýy bar er adamnyń kólikten túsip, qarýdy itterge qarai baǵyttaǵany kórinedi.
Bul oqiǵaǵa qatysty politsiia departamenti túsinikteme berdi. Video 2 naýryz kúni tús aýa Tasqala aýdany Dostyq aýyldyq okrýginde ornalasqan janarmai quiý beketinde túsirilgeni anyqtaldy.
"56 jastaǵy er adam pnevmatikalyq myltyqpen qańǵybas itterge eki ret oq atqan. Biraq oq janýarlarǵa timegen. Bul derek Tasqala aýdandyq politsiia bólimine tirkeldi. Er adamnyń is-áreketinde ákimshilik nemese qylmystyq quqyq buzýshylyq belgileri joq ekendigi anyqtaldy. Material Tasqala aýdanynyń ákimdigine tártiptik komissiia otyrysynda qaraý úshin jiberildi, sebebi er adam Dostyq aýyldyq okrýginiń ákimi", - dep habarlady BQO politsiia departamentiniń baspasóz qyzmeti.
