Densaýlyq saqtaý ministrliginiń aýditorlyq tekserýi Marat Ospanov atyndaǵy Batys Qazaqstan meditsina ýniversitetindegi birqatar kemshilikti anyqtady, dep habarlaidy "Ult aqparat" ministrliktiń baspasóz qyzmetine silteme jasap.
QR Densaýlyq saqtaý ministrligi jospardan tys aýditorlyq tekserý qorytyndysyn quqyq qorǵaý organdaryna jiberdi.
«11 qazanda QR Densaýlyq saqtaý ministrliginde jaýapty hatshy Botagóz Jakselekovanyń tóraǵalyǵymen memlekettik aýdit jáne táýekelder jónindegi keńestiń otyrysy ótti. Jiynda Marat Ospanov atyndaǵy Batys Qazaqstan meditsina ýniversitetinde júrgizilgen jospardan tys memlekettik aýditorlyq tekserý qorytyndysy qaraldy. Anyqtalǵan kemshilikter az emes, atap aitqanda, ýniversitettegi materialdyq taýarlar negizsiz esepten shyǵarylǵan, azamattyq-quqyqtyq mámile sharttaryna sáikes kelmeitin taýarlar, jumystar men qyzmetter bar. «Jastar-Arena» stadionyna júrgizilgen qurylystyń sapasy tómen jáne eńbek zańnamasy buzylǵan» delingen habarlamada.
Keńeste atalmysh medýniversitetten tekserý barysynda tabylǵan barlyq materialdy quqyq qorǵaý organdaryna jiberý týraly sheshim qabyldandy.
Aita ketý kerek, ótken jyly 15 tamyzda Densaýlyq saqtaý ministrligi men Memlekettik qyzmet isteri jáne sybailas jemqorlyqqa qarsy is-qimyl agenttigi yntymaqtastyq týraly memorandýmǵa qol qoiǵan. Onda sybailas jemqorlyq boiynsha kúdik bolǵan kezde jedel den qoiý jáne materialdardy sybailas jemqorlyqqa qarsy is-qimyl organdaryna jiberý qarastyrylǵan.
