Batys Qazaqstan oblysynda turǵyndar dizel otynynyń baǵasyna narazylyq bildirýde.
Energetika ministriniń buiryǵymen, Reseimen shekaralas oblystarda onyń ár litri 260 teńge bolyp bekitilgen edi. Ózge óńirlerde janar-jaǵar mai quny 230 teńgeden aspaýǵa tiis bolatyn. Biraq bul sheshim kóptiń kóńilinen shyqpai otyr, dep habarlady Sputnik Qazaqstan agenttigi Habar 24 arnasyna silteme jasap.
Dizel otyny baǵasynyń qymbattyǵy birinshi kezekte aýyr júk kólikterine seziledi. Óitkeni myńdaǵan shaqyrym jol júredi, tonnalap janarmai tutynady. Al otyn baǵasynyń qymbattyǵy olar tasymaldaityn azyq-túlik pen qurylys taýarlarynyń baǵasyna tikelei áser etedi.
"Shymkentte, Almatyda baǵa 230, Atyraýda 230. Al Aqtóbe men Oralda 260. Nege olai, bilmeimin. Óte qymbat. Soliarka bar, berip jatyr, biraq qymbat", - deidi júrgizýshi Aitbek Tolymbekov.
Aleksei Kapýstin de 260 teńgeniń otyny óte qymbat ekenin aitady.
"Biz ár túrli taýar tasimyz. Janarmai qymbat bolǵan soń ol biz jetkizetin azyq-túlik pen qurylys taýarlarynyń baǵasyna da áser etedi. Gaz baǵasyn túsirdi ǵoi, jaǵar maidyń da arzan bolǵanyn qalaimyz", - deidi ol.
Óńirde satylatyn dizel otynynyń kólemi birneshe esege tómendep ketken. Onyń basty sebebi baǵamen bailanysty. Qazir jaǵar maidyń litri 330 teńgeden bir-aq shyqty. Al maýsymaralyq dizeldi otyn 260 teńgeden satylyp jatyr. Qymbatshylyq óńir kásipkerlerin de tyǵyryqqa tireidi.
"Men júk tasymalymen ainalysamyn. Janarmaidyń qymbattaýy tasymal qunynyń ósýine ákeledi. Ári biz dizel otynynyń baǵasy arzan kórshi óńirlerdiń kásipkerlerimen básekelese almaimyz. Sondyqtan turǵyndar zardap shekpeitindei problemany sheshýdiń basqa jolyn qarastyrý kerek", - deidi kásipker Berik Sydyqov.
Dizel otynyn ministrlik belgilegen shekti baǵadan túsirip satýǵa esh tiym joq. Sarapshylar paiymynsha, baǵanyń bulai qalyptasýyna janarmai naryǵyndaǵylar da múddeli. Usaq kásipkerler dizel otynyn deldaldar arqyly qymbatqa alamyz deidi.
"Baǵany ortalyq apparat belgiledi. Ministrlik shekti baǵany belgilep bergen, sonyń negizinde jumys isteimiz. Biz eshteńe buzǵan joqpyz", - dep túsindirdi janarmai quiý beketteri jelisiniń ókili Tilek Naqpaev.
Ázirge taraptar baǵany arzandatý joldaryn qarastyryp jatyr. Máselen, janarmaidy jergilikti kásiporyndarǵa arzanǵa talonmen berý, janarmai satýmen ainalysatyn kásipkerlerdiń munai óńdeý zaýyttarymen tikelei kelisimine jaǵdai jasaý. Al jylyna 200 tonnadai benzin, sonsha kólemde jaǵar mai shyǵara alatyn Aqsaidaǵy munai óńdeý kesheni shikizat tapshylyǵynan turalap tur.
