Kásipqoi boksta birinshi jartylai orta salmaqta óner kórsetip júrgen qazaqstandyq Batyr Júkembaev (16-0, 13 KO) kelesi jekpe-jegin 26 qyrkúiekte Kanadanyń Monreal qalasynda ótkizedi, dep habarlaidy "Ult aqparat".
Bul týraly ol óziniń facebook paraqshasynda habarlady.
«Assalaýmaǵaleikúm barshańyzǵa! Meniń kelesi jekpe-jegim - 26-qyrkúiekte. Eks-chempionmen ótetin aiqasym - men úshin úlken synaq! Alla qalasa álem chempiony ataný deitin uly maqsatyma bir taban jaqyndai túsemin. Ol qansha azýly bolsa da, qazaq eliniń namysy maǵan kúsh-qýat syilaidy! Qoldaýlaryńyzǵa rahmet!», dep jazdy ol jeke paraqshasynda.
Tolyqtyryp aita ketsek, Júkembaev kelesi aiqasyn meksikalyq 32 jastaǵy Migel Vaskesqa (41-8, 15 KO) qarsy ótkizedi. Ol 2010-2014 aralyǵynda jeńil salmaqta IBF tujyrymy boiynsha álem chempiony bolǵan. Jekpe-jek - birinshi orta salmaqta 10 raýndtan turady.
Aita keteiik, 26 qyrkúiekte ótetin boks keshinde taǵy úsh qazaqstandyq sportshy óner kórsetedi: Sadriddin Ahmedov (9-0, 8 KO), Nurzat Sabyrov (10-0, 9 KO) jáne Aman Qazanǵapov (0-0-1). Olardyń qarsylastary keiin anyqtalady.
