Almatyda tanymal zańger soqqyǵa jyǵyldy. Oqiǵa týraly jábirlenýshi Oleg Chernovtyń áieli, zańger Anna Dimitrievich aitty. Ol da sol jerde bolǵan jáne jaraqat alǵan, - dep habarlaidy Tengrinews.kz portaly.
Oqiǵa Almatydaǵy meiramhanalardyń biriniń mańynda keshki ýaqytta bolǵan.
Áieldiń aitýynsha, kúieýi ekeýi taksige ketip bara jatqanda, olarǵa bir jigit júgirip kelip, soqqyǵa jyǵylǵan qyzǵa kómektesýlerin suraǵan.
"Bizden birneshe metr jerde bir jigit qyzdy shynymen, uryp jatty. Biz oilanbastan júgirip baryp, ony toqtatýǵa tyrystyq. Meni ustap alyp, "Kómektesińizshi! Kómektesińizshi!" degeni áli esimde. Sosyn jigit bizge kóshti. Oleg soqqydan qulap qaldy. Ornynan turaiyn degende, tebe jóneldi. Ol Olegtiń basyn fýtbol dobyndai tepti. Men shabýyldaýshyny toqtatýǵa tyrystym, biraq ol jaǵymnan kúshpen urǵanda, soqqydan ushyp ketip, asfaltqa qulap, esimnen tanyp qaldym. Endi esimdi jiǵanda, politsiia da keldi", - dep jazdy Dimitrievich Facebook-paraqshasynda.
Qazaqstandyq zańgerler shabýyl jasaǵan adamnyń Qazaqstannyń eńbek sińirgen jattyqtyrýshysy Dáýlet Turlyhanovtyń uly ekenin aitty. Almaty politsiiasy kúdiktiniń kim ekenin aitpady, biraq oqiǵaǵa qatysty pikir bildirdi.
"Almaty Politsiia departamenti bul derek QR Qylmystyq kodeksi 293-baby - "Buzaqylyq" boiynsha sotaldy tergep-tekserýdiń biryńǵai tizilimine tirkelgenin habarlaidy. Qylmystyq is boiynsha alǵashqy tergeý áreketteri júrgizildi, saraptamalar taǵaiyndaldy. Qazirgi ýaqytta kúdikti áskeri adam bolǵandyqtan, is materialdary sottylyǵyn anyqtaý úshin qalalyq prokýratýraǵa jiberildi", - dedi Almaty Politsiia departamentiniń baspasóz qyzmeti ókilderi.
