Túrkistan oblysynda "eki qoi urlady" dep kúdikke ilinip, ustalǵan Nurbolat Ómirbekov Saýran aýdany politsiia bóliminde azaptalǵanyn aitty. Bul jóninde Otyrar.kz saity habarlady, dep jazady Azattyq.
Ómirbekovtiń sózine qaraǵanda, oqiǵa aqpan aiynda bolǵan. Onyń politsiiada azaptalǵan kezde aiqailaǵany sol kabinetke jaqyn ornalasqan dálizdegi kameraǵa jazylyp qalǵan. Telearna siýjette sol videodan da úzindi keltiredi.
"Maǵan maldy sen urladyń dedi, men urlamadym dedim. Basyma qap kigizip, uryp-soǵa bastady. Ózińe jaman bolady dedi. Qandai da bir qujattar ákelip, eger qol qoimasań qaita azaptaitynyn aitty. Men "eger eshteńe jasamasam, neni moiyndaimyn" dedim. Olar taǵdyryń sheshilip qoiǵan, prokýrormen kelisip alǵanbyz dep qorqytty" dedi Nurbolat Ómirbekov.
Saittyń jazýynsha, keiin Ómirbekovtiń qoi urlyǵyna qatysy joǵy anyqtalyp, kúdiktiler qatarynan alynǵan. Ol "ózin azaptaǵan" bes politseidiń ústinen aryz jazǵan.
Aqparatqa qaraǵanda, bes politseidiń áreketine qatysty qylmystyq is qozǵalǵan. Alaida qandai bap boiynsha qozǵalǵany belgisiz.
Qazaqstanda azaptaýǵa bailanysty qylmystyq isterdiń sotqa jetetin kezi sirek, aiyptaý úkim shyǵatyn jaǵdai da óte az kezdesedi. Basym bóligi "qylmys quramy bolmaǵandyqtan" nemese "aiǵaq jetpegendikten" tergeý kezinde jabylady. Adam quqyǵyn qorǵaý biýrosynyń habarlaýynsha, jyl basynan beri quqyq qorǵaýshylarǵa azaptaý jáne ózge de zańsyz áreketter boiynsha 172 shaǵym túsken.
Elde azaptaý boiynsha aryz-shaǵymdar Qańtar oqiǵasynan keiin kóp tústi. Bas prokýratýra buǵan deiin Qańtardaǵy azaptaýlarǵa qatysty 8 isti tergep jatqanyn, kúshtik qurylymnyń 15-iniń kúdikti atanǵanyn, toǵyzy qamaýda ekenin aitqan. Osyǵan deiin jábirlenýshiler Qańtardaǵy azaptaýlar boiynsha isterdiń baiaý júrip jatqanyna alańdaǵan.
Naýryzdyń ortasynda Bas prokýratýra azaptaý aryzdary boiynsha 243 is qozǵalǵanyn habarlaǵan edi. Tórt aidan soń, "QazAqparatta" jaryq kórgen suhbatynda Ishki ister ministri Marat Ahmetjanov azaptaý shaǵymdary boiynsha isterdi júrgizetin Sybailas jemqorlyqqa qarsy qyzmettiń 137 isti toqtatqanyn aitqan.
Resmi málimet boiynsha, Qańtarda qaza bolǵan 238 adamnyń altaýy azaptaýdan kóz jumǵan.
