Qazkom banki Oǵyz Doǵanǵa qazaq tilinde qyzmet kórsetýden bas tartqan qyzmetkerleri úshin keshirim surady, dep habarlaidy Sputnik Qazaqstan.
Qoǵamda rezonans týdyrǵan oqiǵa keshe Astanadaǵy "Saryarqa" bank bólimshesinde bolǵan edi. Filial qyzmetkerleri bankke klient retinde kelgen Oǵyz Doǵanǵa memlekettik tilde qyzmet kórsetýden bas tartqan. Oǵyz Doǵan orys tilin túsinbeitinin birneshe márte aitsa da, bank qyzmetkerleri klienttiń sózin elemegen. Búgin bank basshylyǵy kesheli beri áleýmettik jelide shý týǵyzǵan oqiǵaǵa bailanysty málimdeme jasady.
"Bank keshegi oqiǵa úshin barlyq qatysýshylar men kýágerden keshirim suraidy.Til týraly zańǵa sáikes, bank óz qyzmetin memlekettik tilde, iaǵni qazaq tilinde jáne resmi statýsy bar orys tilinde kórsetedi. Klientterdiń suranysy boiynsha jáne Qazaqstan Respýblikasynda tilderdi damytý men qoldanýdyń 2011-2020 jyldarǵa arnalǵan memlekettik baǵdarlamasy boiynsha bank úsh tilde qyzmet kórsetýge daiyn", — delingen banktiń málimdemesinde.
Habarlamadaǵy aqparatqa súiensek, "Kazkommertsbanktiń" barlyq bólimshesinde qazaq tilin jetik biletin mamandar bar. Klientterge qyzmet kórsetetin barlyq menedjerler memlekettik tildi meńgergen. Qarjy mekemesi klienttiń talabyn oryndamai, orys tilinde ǵana sóilegen bank qyzmetkerleriniń áreketin aqtamaitynyn málimdedi.
"Astanadaǵy "Sary-Arqa" filialynyń qyzmetkerleri arasynda da qazaq tilin joǵary deńgeide biletin menedjerler bar. Bul jaǵdaida da biz klientke qajetti bank qyzmetin qazaq tilinde usyna alar edik, ókinishke qarai, túsinbeýshilik saldarynan bólimshe qyzmetkerleri emotsiiaǵa berilip, klientke qyzmetti durys kórsetpedi. Qyzmetkerlerimizdiń bul is-áreketin biz aqtamaimyz. Alaida bul oqiǵany beinetaspaǵa túsirýge bailanysty strestik jaǵdai týǵyzǵanyn atap ótkimiz keledi. Bolashaqta mundai oqiǵa qaitalanbas úshin biz óz qyzmetkerlerimizge tiisti oqytý treningterin ótkizemiz", — dep ýáde berdi bank basshylyǵy.
