Elbasy Nursultan Nazarbaev «Bastaý biznes» jobasynyń 5 jyldyǵyna arnalǵan forýmǵa qatysýshylarǵa beineúndeý joldady, dep habarlaidy QazAqparat.
«Barshańyzǵa málim, shaǵyn jáne orta biznesti jan-jaqty qoldaý — memlekettik saiasattyń basym baǵyttarynyń biri. Sol úshin biz tiisti zańnamany jetildirip, salyq aýyrtpalyǵyn azaittyq, ákimshilik rásimderdi qysqartyp, kredittik resýrstarǵa qoljetimdilikti arttyrdyq. Sonyń arqasynda elimizde shaǵyn jáne orta kásipkerlik sýbektileri jyl sanap artyp, ekonomikanyń osy sektorynda eńbek etetin azamattar kóbeidi. Qazirgi tańda shaǵyn jáne orta biznes salasynda jumys isteitin adamdardyń sany 4 millionǵa, al onyń jalpy ishki ónimdegi úlesin 35 paiyzǵa jetkizý úshin biraz sharýa atqarylyp jatyr. Bul mindet «Nur Otan» partiiasynyń «Ózgerister joly: ár azamatqa laiyqty ómir» atty baǵdarlamasynda naqty kórinis tapty», - dep atap ótedi QR Tuńǵysh Prezidenti.
Nursultan Nazarbaev 2016 jyly elimizde jappai kásipkerlikti damytý jóninde bastama kótergenin eske salyp ótedi.
«Búginde bul bastama osy maqsatqa qol jetkizýdiń mańyzdy quralyna ainalyp otyr. Onda aýyl-aimaqtar men shaǵyn qalalarda óz isin bastaǵan kásipkerlerdi qoldaýǵa erekshe kóńil bólý keregi aitylǵan. Bastamanyń taǵy bir negizgi baǵyty – jańadan kásip ashqan biznesmenderdi qoldaý sharalaryn qarjylyq saýattylyqqa oqytý júiesin engizý edi. Sóitip, «Atameken» Ulttyq kásipkerler palatasy «Bastaý biznes» jobasyn qolǵa aldy. Ol nátijeli jumyspen qamtý jáne jappai kásipkerlikti damytýǵa arnalǵan «Eńbek» baǵdarlamasynyń mańyzdy bóligine ainaldy.
