Ǵylym jáne joǵary bilim ministri Saiasat Nurbek ómirinde alǵash ret óz bastamalaryn júzege asyrýǵa múmkindik alǵanyn aitty, dep habarlaidy Sputnik Qazaqstan.
Nurbek ministr laýazymyna ózi suranbaǵanyn, bul Prezidenttiń sheshimi ekenin aitty.
"Men suranǵan joqpyn. Nege deseńiz, men Májiliske depýtat bolyp kirdim. Osy shaqyrylymnyń sońyna deiin qyzmet etýge daiyndaldym. Biraq, Prezidentimiz, saiasi basshylyǵymyz solai sheshti. Osyndai óte jaýapty, óte qiyn ýchaskeni maǵan bólip berdi", - dedi ol Úkimet kýlýarynda jýrnalisterdiń suraǵyna jaýap berip.
BAQ ókilderiniń "ministr qyzmeti unap jatyr ma, kreslosy jumsaq pa eken?" degen saýalǵa: "Kreslo joq qoi. Mende kabinet te, ǵimarat ta, adam da joq. Kreslony áli tabýym kerek", dep kúldi Saiasat Nurbek.
"Endi-endi berip jatyr. Biz ázirge burynǵy bilim jáne ǵylym ministrliginiń ǵimaratynda otyrmyz. Sol ministrlikti ekige bólý protsesi bastaldy. Biraq bul - sál kúrdeli protsess. Bizge qazir úlken ákimshilik aýyrtpashylyq túsedi. Birinshi maqsatymyz – ministrlikti quryp alý", - dedi ol.
Ázirge jańa qyzmette jalaqysy qansha bolatynyn da bilmeitinin aitty. Ǵylym ministri alda óte kóp jumys kútip turǵanyn atap ótti.
"Biyl sońǵy 15 jylda jinaǵan búkil usynysty jinaqtap, júzege asyrýǵa múmkindik berildi. Sondyqtan, bir jaǵynan, alaqanym qyshyp otyr. Ózimniń bastamalarymdy, oilarymdy júzege asyrýǵa ómirimde birinshi ret múmkindik berildi. Ishtei qobaljyp ta turmyn. Biraq halqymyzǵa qyzmet etýge, Prezidenttiń senimin aqtaýǵa degen úlken úmit te bar", - dedi Saiasat Nurbek.
Ol sapasyz bilim beretin joǵary oqý oryndaryn jabý boiynsha Ashat Aimaǵambetov bastaǵan jumysty ári qarai jalǵastyratynyn málimdedi.
"Mindetti túrde jalǵastyramyz. Shyn máninde, Ashat Qanatuly úlken jumys atqardy. Ol bilik tarapynan joǵary baǵalandy. Biz osy printsipialdy pozitsiiamyzdy ustap, joǵary oqý deńgeiinde, eń aldymen, sapany qamtamasyz etýge búkil kúshimizdi jumsaimyz", - dedi Nurbek.
