"Aqmola oblysyna qarasty Aqkól aýdanynyń ortalyǵynda ashylǵan zamanaýi bassein salaýatty ómir saltyn ustanǵan eldiń igiligine jarap tur. Úsh jolaqty jasandy aidynda jyl on eki ai júzýge múmkindik bar. Rio Olimpiadasyn qalt jibermei, qadala qaraityn jergilikti halyq zaman talabyna sai tamasha basseinge elimizdiń mereiin asyrǵan Dmitrii Balandinniń esimin berýdi qosh kórip otyr", - dep habarlaidy Ult.kz tilshisi. 24.kz arnaǵa silteme jasap.
Áýeli Aqkólde salynǵan ǵimarat týraly eki aýyz sóz. Ine-jipten eki jyl buryn shyqqan jasandy aidynda alǵashqyda mektep oqýshylary júzetin. Keiin aýylda turatyn kári-jas maltýǵa mashyqtandy. Buryn qulaq estigen, biraq kóz kórmegen keremetti jergilikti jurttyń jaqtyrǵany anyq.
"Kúnine keminde 120 áýesqoi keledi. Jas mólsherleri ártúrli. Jasy da bar, jasamysy da bar. Munda sýǵa júzýdi kásibi meńgergisi keletinder kóp. Shákirtterimniń aldy respýblikalyq jarystarǵa qatysyp júr. Endi álemdik dodaǵa tússe deimin" - deidi jattyqtyrýshy Sergei Deviatko.
Dmitrii Balandin báigeden kelgen kúni aqkóldikter tyń bastama kóteripti. Ǵimaratqa Olimpiada chempionynyń esimin berý týraly usynys túsirgen.
"Basseindi qalai ataýdy oilanyp júr edik. Endi, mine, chempion atymen ataityn bolamyz. Sebebi Aqkól turǵyndary ótinish bildirdi. Osy bizden de, Aqkólden de chempion shyqsyn degen úmittemiz" dep qostady jattyqtyrýshynyń sózin aýdandyq jastar ortalyǵynyń jetekshisi Madina Qusaiynova.
Balandin atyndaǵy júzý basseini. Nesi bar, jarasyp tur. Chempionǵa qurmet, sańlaqqa tartý sekildi. Sosyn úmit úkilenedi. Balalar Aqkólde shynyǵyp, álem birinshiligine qatysyp jatsa, qandai ǵajap! Jiyrma bes metrlik, úsh jolaqty, sýy móldir eken. Júzip júrgenderdiń de pikiri jaqsy.
"Kúnde kelip túsip jatyrmyz. Sýy taza, bári de jaqsy, jattyǵýshylar da jaqsy. Keshe estidik, Balandin Rio Olimpiadasynda chempion atanypty. Qutty bolsyn!" - deidi bolashaq Balandinniń aty beriletin basseiinniń búgingi tutynýshysy Adaibek Abdýllaev.
Aqkól jurty jyl on eki ai jyly sýda júzedi. Sheberlikterin shyńdaidy. Maltýǵa mashyqtanady. Jastary Dima aǵalary sekildi Olimpiada shyńyn baǵyndyrýdy armandaidy. Armannyń alasasy bola ma?!
