Elimizde baspanaǵa muqtaj otbasylarǵa jeke turǵyn úi qoryndaǵy jaldaý aqysyn memlekettik qarajat esebinen 80 paiyzǵa deiin sýbsidiialaý josparlanǵan. Bul jaiynda Májilis depýtattarynyń saýalyna QR Premer-Ministriniń jaýabynda aitylǵan, dep habarlaidy QazAqparat.
«Búgingi kúni «Shańyraq» jeńildetilgen ipotekalyq baǵdarlamasy pilottyq rejimde (2020-2022 jyldary) iske asyrylyp jatyr. Oǵan turǵyn úige muqtajdar esebinde turǵan azamattar ǵana, iaǵni jergilikti atqarýshy organdarda kezekte turǵan adamdar qatysa alady. 2020 jyldan bastap osy baǵdarlama boiynsha 18 myń ótinim kelip tústi. Onyń ishinde búgingi kúni 6,7 myńǵa jýyǵy maquldandy», - dedi Asqar Mamin.
Onyń atap ótýinshe, «Shańyraq» baǵdarlamasy aiasynda ipoteka boiynsha syiaqy mólsherlemesi jyldyq 5 paiyzdy quraidy jáne bul eń tómen mólsherlemelerdiń biri bolyp tabylady. Baǵdarlamaǵa qatysýshylarǵa qoiylatyn talaptardyń biri - eńbek qyzmetinen túsetin tabystyń bolýy (otbasynyń árbir múshesine eń tómengi kúnkóris deńgeiiniń 3,7 eselengen mólsherinen aspaityn). Bul talap asa muqtaj kezekte turǵan adamdardy qoljetimdi turǵyn úimen qamtamasyz etý maqsatynda belgilengen.
«Ipotekalyq kredit berý qarjy institýttary úshin joǵary táýekeldi quraldar bolyp sanalady. Qaryz alýshynyń eńbek qyzmetiniń kiristeri boiynsha tólem qabilettiligin baǵalaý mindettemelerdi ýaqtyly oryndaý úshin kepilger bolyp esepteledi jáne qarjy institýttarynyń kredittik portfelindegi qaryzdardyń «jumys istemeitin» táýekelderin boldyrmaidy. «Shańyraq» pilottyq jobasyn iske asyrý úshin «Otbasy bank» AQ qarajatyn Ulttyq bank qaitarymdy jáne aqyly negizde usyndy. Bul óz mindettemelerin oryndaýǵa qabiletti qaryz alýshylardy irikteýdi talap etedi. Joǵaryda aitylǵandarǵa súiene otyryp, kiristerdi qujattyq rastaýsyz azamattardyń tólem qabilettiligin tekserý múmkin emes», - dedi ol.
Sonymen qatar Úkimet basshysy qazirgi ýaqytta kezekte turǵan adamdardy turǵyn úimen qamtamasyz etý máselelerin tiimdi sheshý maqsatynda Memleket basshysynyń tapsyrmasymen otbasynyń árbir múshesine 1 eń tómengi kúnkóris deńgeiine deiingi tabysy bar muqtaj kezekte turǵan adamdar úshin jeke turǵyn úi qorynda jaldaý aqysyn sýbsidiialaý tetigin engizý máselesi pysyqtalyp jatqanyn aitady.
«Osylaisha, jeke turǵyn úi qoryndaǵy jaldaý aqysyn memlekettik qarajat esebinen 80 paiyzǵa deiin sýbsidiialaý josparlanǵan. Mysaly, naryqta jaldaý aqysy 100 myń teńge bolǵan jaǵdaida, 1 eń tómengi kúnkóris deńgeiine deiingi tabysy bar kezekte turǵan adamdarǵa ai saiyn jaldaý aqysy esebine 80 myń teńge kóleminde sýbsidiia beriledi. Sondai-aq zańnamaǵa qajetti túzetýler qabyldanǵannan keiin «Otbasy bank» AQ ortalyqtandyrylǵan túrde turǵyn úige muqtaj adamdardy kezekke qoiýdy jáne esepke alýdy júzege asyratyn, sondai-aq «qoljetimdilik satylaryna» sáikes kezekte turǵan adamdar úshin turǵyn úidi basym túrde usynatyn bolady»,- dedi Asqar Mamin.
Premer-Ministrdiń atap ótýinshe, ol úshin árbir ótinimge kiristerdi, múlik pen aktivterdi ashatyn otbasynyń tsifrlyq portreti qalyptastyrylady. Osylaisha, bul tásil halyq úshin memlekettik qoldaýdyń ataýlyǵyn qamtamasyz etýge jáne turǵyn úi alýǵa muqtaj adamdardyń barlyq sanattaryn qamtýǵa múmkindik beredi», - dedi Asqar Mamin.
