Almatyda ótip jatqan Qarjygerler kongresinde «Baspana» Ipotekalyq uiymy» AQ basqarma tóraǵasy Qairat Altynbekov «7-20-25» baǵdarlamasynyń nátijesi týraly aityp berdi, dep habarlaidy QazAqparat tilshisi.
«Bizdiń áriptes bankter quny 50 mlrd teńge bolatyn ótinim qabyldady. Onyń ishinde 35 mlrd teńgeniń nesieleri maquldandy. Búginde ipotekalyq uiymmen 7 bank seriktese jumys jasap jatyr. Biz ipotekalyq naryqtyń infraqurylymyn jaqsartatyn, kreditorlardyń quqyǵyn qorǵaityn, biznes-protsesterdi avtomattandyratyn, barlyq naryqqa tiimdi yqpal etetin dúnielerdi qolǵa almaqpyz», - dedi Qairat Altynbekov paneldi otyrysta.
Aita ketsek, QR Ulttyq banki tóraǵasy atalǵan baǵdarlamanyń operatory «Baspana» ipotekalyq uiymy bolatynyn 5 mamyrda málim etken edi. Ulttyq bank bekitken baǵdarlama boiynsha ipotekalyq qaryzdar 7% jyldyq mólsherlememen 25 jylǵa beriledi. Kelesi sharttarynyń biri - alǵashqy salym 20% bolmaq. Jańa ipotekalyq zaimdardy QR kez kelgen azamat ala alady. Ol úshin eń basty shart - adamnyń basynda jyljymaityn múlki bolmaýy kerek. Baǵdarlama boiynsha Qazaqstannyń kez kelgen óńirinen Almaty, Astana, Atyraý jáne Shymkent qalalarynan eń maksimaldy 25 mln teńgege, qalǵan óńirlerde 15 mln teńgege baspana satyp alýǵa bolady.
Elbasy Nursultan Nazarbaevtyń Qazaqstan halqyna Joldaýynda berilgen tapsyrmalarǵa sáikes, «7-20-25» baǵdarlamasyna qatysýǵa niet bildirgen azamattardyń alǵashqy jarnasyn arzandatý úshin jalpy sany 50 myń danadan kem emes turǵyn úi sertifikattary shyǵarylatyn bolady.
