Zeinetaqy jinaqtarynyń esebinen úi alatyn adamdardyń azaiýyna bailanysty aldaǵy eki aida baǵanyń ósýi toqtaidy. Bul týraly indýstriia jáne infraqurylymdyq damý vitse-ministri Qaiyrbek Óskenbaev málimdedi, dep habarlaidy "Ult aqparat".
Ortalyq kommýnikatsiialar qyzmetinde ótken onlain brifingte ol jańa baǵdarlama (zeinetaqy jinaqtarynyń bir bóligin merziminen buryn alý) iske qosylǵannan keiin úidiń baǵasy óse bastaǵanyn atap ótti. Iaǵni, qańtar aiynda jańa úidiń baǵasy 3 paiyzǵa ósse, buryn salynǵan úiler 5 paiyzǵa qymbattaǵan.
"Biz apta saiyn jyljymaityn múlik baǵasyn baqylap otyramyz. Jańa baǵdarlama engizilgennen keiin turǵyn úi baǵasy kóterile bastady. Bastapqy naryqtaǵy turǵyn úi quny qańtarda 3 paiyzǵa, qaitalama naryqtaǵy turǵyn úi 17 paiyzǵa qymbattady. Naýryzda baǵanyń ósýi toqtady. Birinshisi 0,5 paiyzǵa, al ekinshisi eki paiyzǵa qymbattady.
Sol sebepti qazir sáýir men mamyr aiynda baǵalardyń ósýi toqtap, maýsym-shilde aiynan bastap turaqtylyq bolady dep oilap otyrmyz", – dedi Óskenbaev.
Alaida vitse-ministr baǵanyń ósýi tek toqtaitynyn ǵana jetkizdi. Burynǵy deńgeige túsetinine eshkim kepildik bere almaidy. Oǵan qosa, Qazaqstanda biraz qurylys materialdary shyǵarylsa da, shyny, sanfaians, túsqaǵaz siiaqty ónimder tolyǵymen shetelden jetkiziledi.
Al armatýrany óz elimizde shyǵarýǵa múmkindik bar. Biraq qara metaldyń basym bóligi shetelge ketip jatady. Osy shikizat ózimizde qalsa, baǵany da retteýge bolady.
"Biyl Qyzylordada shyny zaýytynyń qurylysy aiaqtalsa, osy ónim tolyǵymen ózimizde shyǵarylady. Sanfaians pen túsqaǵazdy da shetelden ákelemiz. Osy jyly "Samuryq-Qazynamen" birigip, investorlardy izdep, osy zaýyttardyń qurylysyn bastaýdy josparlap otyrmyz. Sosyn jylý ótkizbeitin materialdardyń 62 protsenti importtalady. Ony da biyl 100 protsent ózimizde shyǵarýdy josparlap qoidyq. Osyndai zaýyttar ashylady. Sol ýaqytta ǵana úilerdiń baǵasy arzandaidy degen senim bar", – dep atap kórsetti Óskenbaev.
«Otbasy bank» AQ basqarma tóraǵasy da baǵalarǵa júrgizilgen taldaý álem boiynsha qurylysta paidalanylatyn shikizat pen materialdar baǵasynyń óskenin kórsetti dep otyr.
«Jyljymaityn múliktiń ózindik baǵasynda eńbek resýrstarynyń quny óte úlken úleske ie. Qazaqstandaǵy ortasha jalaqy statistikasyna qarasaq, 2020 jyldyń tórtinshi toqsanynyń qorytyndysy boiynsha 233 136 teńge boldy. Búgin resmi statistika shyqty. Birinshi toqsannyń qorytyndysy boiynsha nominaldy ortasha jalaqy shamamen 11 paiyzǵa ósti. Tiisinshe, kranshylardyń, monolit quiatyn qyzmetkerlerdiń, árleýshilerdiń eńbegi jyljymaityn múliktiń bastapqy naryǵyna áser etedi. Biz óz tarapymyzdan taldaý júrgizip, jyldyń ekinshi jartysynda, buǵan deiin boljaǵanymyzdai, mamyrdyń sońy men maýsymnyń basynan bastap baǵa naryǵy turaqtanady dep oilaimyz», - dedi Lázzat Ibragimova.
