QR Premer-Ministriniń tóraǵalyǵymen ótken Úkimet otyrysynda Memleket basshysynyń «Syndarly qoǵamdyq dialog – Qazaqstannyń turaqtylyǵy men órkendeýiniń negizi» joldaýyn iske asyrý sharalary talqylandy. QR Premer-Ministriniń orynbasary Jeńis Qasymbek turǵyn úi, sýmen jabdyqtaý, kóp páterli úilerdi kúrdeli jóndeýden ótkizý, avtojoldar, aviabiletterdiń qoljetimdiligi máseleleri jóninde baiandady, dep habarlaidy "Ult aqparat".
«Qazirgi tańda baspana alý úshin ákimdikterde 512 myńǵa jýyq adam kezekte tur. Kezektilikti biryńǵai esepke alý tapsyrmanyń aiasynda jyldyń sońyna deiin Kezekte turǵan adamdardyń biryńǵai respýblikalyq bazasy engiziledi. «Nurly jer» baǵdarlamasyn iske asyrý aiasynda, birinshi kezekte kóp balaly otbasylarǵa jalǵa beriletin baspanalar beriledi.
Bul úshin biz 2025 deiin jyl saiyn 50 mlrd teńge bólemiz. Jyl saiyn 3,7 myń kezekte turǵan áleýmettik jaǵynan osal adamdardy satyp alýsyz jalǵa beriletin turǵyn úimen qamtamasyz etýge 32,8 mlrd teńgeden bólý qarastyrylǵan. “Baqytty otbasy” baǵdarlamasy boiynsha 6 myń nesie berýge Turǵyn úi qurylys jinaq banki arqyly úsh jylda 50 mlrd teńge qarjylandyrylady», — dedi J. Qasymbek.
Úkimetke 2023 jylǵa qarai halyqtyń sapaly aýyz sýǵa 100% qoljetimdiligin qamtamasyz etý maqsaty júkteldi. 2019 jyly 97% qala turǵyndary jáne 87% aýyl turǵyndary ortalyqtandyrylǵan sýmen qamtamasyz etiletin bolady.
«Nurly jer» jańa baǵdarlamasyndaǵy aýyz sýmen qamtamasyz etý sharalarynda «Aýyl – El Besigi» jobasynda anyqtalǵan óńirlik saiasattyń basymdylyqtary eskeriledi.
«Ortalyqtandyrylǵan sýmen eń kóp sany jáne joǵary áleýeti bar aýyldar basym tártippen qamtamasyz etiletin bolady, al 200 adamǵa deiin turatyn eldi mekenderde sýmen jabdyqtaýdyń jergilikti júieleri qoldanylatyn bolady. Respýblikalyq biýdjette 2020 jyldan 2022 jylǵa deiin osy maqsattarǵa 250 mlrd teńge kózdeldi. Respýblika boiynsha qazirgi tańda 18,1 myń úi kúrdeli jóndeýdi talap etedi. Memleket basshysynyń tapsyrmasyna sáikes 780 kóp páterli turǵyn úidi jóndeýge qosymsha 30 mlrd teńge qarastyrady», — dedi QR Premer-Ministriniń orynbasary.
Avtojol salasynda qazirgi ýaqytta «Nurly jol» memlekettik baǵdarlamasyn 2025 jylǵa deiin uzartý jumystary aiaqtalýda. Baǵdarlama sheńberinde elimizdiń biryńǵai kólik júiesi qalyptasady.
«Memleket basshysynyń «Syndarly qoǵamdyq dialog – Qazaqstannyń turaqtylyǵy men órkendeýiniń negizi» joldaýynyń máseleleriniń biri — avia biletterdiń qoljetimdiligi máselesi. Tasymaldaý syiymdylyǵynyń tapshylyǵy jáne bar suranysty qanaǵattandyrý úshin áýe kemelerdiń jetispeýshiligi áýe biletteriniń joǵary quny bolýynyń eń basty problemasy bolyp tur.
Tarifterdiń qunyn túsirý maqsatynda biylǵy mamyr aiynda birinshi otandyq tómen biýdjetti «Fly Arystan» tasymaldaýshy jumysyn bastady. Aǵymdaǵy jyldyń sońynda «Fly Arystan» oryndalatyn reister sanyn kúnine 14-ten 28 jiilikke deiin arttyrýdy josparlap otyr.
Sonymen qatar “Samuryq-Qazyna” ulttyq ál-aýqat qory» Aktsionerlik qoǵamymen birige otyryp, Úkimet áýe kemeleri parkin ulǵaitý maqsatynda “Eir Astana” jáne “Qazaq Air” aviakompaniialaryn qosymsha kapitaldandyrýdy josparlap otyr. Sonymen qatar, qazaqstandyq munai óndeý zaýyttardyń aiaqtalǵan jańǵyrtýyn esepke ala otyryp, áýe otynnyń baǵasyn tómendetý boiynsha jumys jalǵastyrylatyn bolady. Temir jol biletteriniń jetispeýshiliginiń aldyn alý maqsatynda biletterdi satýdy tsifrlandyrý júrgizilýde, biletterdi satý tártibin retteitin norma engizildi, temir jol kóligimen jolaýshylardy tasymaldaý júiesin jetildirý jospary jasaldy», — dedi J. Qasymbek.
«Aýyl – El besigi» jobasynyń sheńberinde halyqaralyq sarapshylarmen jáne óńirlermen birlesip aýyldardyń áleýetin anyqtaýdyń jańa ádistemesi ázirlendi. Sonyń nátijesinde damý áleýeti bar 3,5 myń aýyl irikteldi. Bul aýyldarda 6,6 mln adam nemese elimizdiń aýyl halqynyń 85%-y turady. Aǵymdaǵy jyly 30 mlr teńge bólindi, olar 700 myńǵa jýyq adam turatyn 53 aýyldyń birinshi kezektegi infraqurylymdyq máselelerin sheshýge baǵyttalǵan.
QR Premer-Ministriniń orynbasarynyń aitýynsha, Qazaqstan Respýblikasynyń Prezidenti Qasym-Jomart Kemeluly Toqaevtyń tapsyrmasy boiynsha «Aýyl – El besigi» jobasyn iske asyrýǵa 2020-2022 jyldarǵa qosymsha 90 mlrd teńge bólinetin bolady.
Sonymen birge, jyl sońyna deiin Indýstriialandyrýdyń 2020-2025 jyldarǵa arnalǵan memlekettik baǵdarlamasy qabyldanady. Baǵdarlamany iske asyrý nátijesinde eńbek ónimdiliginiń 1,7 ese naqty ósýi, óńdeý ónerkásibi eksporty kóleminiń 2,3 ese ósýi, negizgi kapitalǵa investitsiialardyń 2,3 ese naqty ósýi bolady.
