Básekelestikti qorǵaý jáne damytý agenttiginiń tóraǵasy Serik Jumanǵarin janar-jaǵarmai naryǵyndaǵy jaǵdaiǵa túsinik berdi, dep habarlaidy QazAqparat.
«Búgingi tańda AI-92 markaly benzindi satý naryǵynda turaqtylyq baiqalyp otyr. Iri jelilerdiń satý baǵasy litrine 175 teńgeden aspaidy.
Agenttik óńirlik benzin satýshylarǵa jáne «Petro retail», «Sinoil» jáne «Gelios» sekildi úsh iri jelige 14 habarlama joldady. Barlyq nusqaýlar oryndaldy. Jalpy, respýblikada benzin baǵasynyń tómendeýi orta eseppen 3 paiyzdy qurady», - dedi Jumanǵarin Úkimet otyrysynda.
Dizel otynyna toqtalǵan agenttik basshysy, qazirgi kezde iri jelilerdiń satý baǵasy litrine 200 teńgeden aspaitynyn jetkizdi. Agenttik óńirlik dizel otynyn bólshek saýdada ótkizýshilerge 19 eskertý jáne 4 iri jelige nusqaý jasady. Osy oraida «Gazpromneft-Qazaqstan» JShS, «Petro retail» JShS, «Sinoil» JShS jáne «Gelios» JShS-ǵa jiberildi. Barlyq nusqaýlar oryndaldy.
Sonymen qatar, biylǵy 1 shildeden bastap dizel otynyna aktsiz tonnasyna 540-tan 9 300 teńgege deiin óskenin atap ótken jón, bul baǵaǵa orta eseppen litrine 8 teńgege deiin áserin tigizedi.
