QR Bas prokýrory Ǵizat Nurdáýletov kollektorlyq uiymdarǵa kelip túsken shaǵymdar týraly málimet berdi, dep habarlaidy QazAqparat tilshisi.
«Prokýratýra organdary kollektorlar qyzmetindegi zań buzý faktilerin anyqtaý jáne jolyn kesý boiynsha josparly jumys júrgizýde. Búgingi tańda elimizde 200-ge jýyq kollektorlyq uiym jumys isteidi. Olardyń qyzmeti únemi azamattardyń synyna ushyrap jatady. 2020 jyly men biylǵy 8 aida ýákiletti organǵa olardyń zańsyz áreketteri týraly 691 shaǵym kelip tústi. Sol shaǵymdar boiynsha tekserýler júrgizildi», - dep jazdy Ǵizat Nurdáýletov depýtattyq saýalǵa bergen jaýabynda.
Sondai-aq, ol kollektorlyq uiymdar jii jiberetin negizgi zańbuzýshylyqtardy atady.
«Negizgi buzýshylyqtar – boryshkerdi mindettemelerdi oryndaýǵa májbúrleitin josyqsyz áreketter; bereshektiń mólsherine, sipatyna jáne týyndaý negizderine qatysty jańylystyrý; qaryz boiynsha quqyqtardyń (talaptardyń) úshinshi tulǵaǵa ótý múmkindigi týraly habarlama talabyn saqtamaý jáne basqalar», - dep atap ótti Bas prokýror.
Onyń málimeti boiynsha, tekserýler qorytyndysy negizinde tizilimnen 28 kollektorlyq agenttik shyǵarylǵan.
«Sondai-aq 12 mln teńgege 60 den qoiý sharasy men sanktsiialar qoldanyldy. Tekserý qorytyndysy boiynsha 22 kollektorlyq agenttik qyzmetin erikti túrde toqtatý týraly sheshim qabyldady. 4 jyl ishinde kollektorlyq kompaniialarǵa ákimshilik quqyq buzýshylyq týraly bar-joǵy 45 hattama jasalǵan. Bul olardyń atyna jiberilgen buzýshylyqtar men shaǵymdar sanyna naqty sáikes kelmeidi. Kollektorlardy buzýdyń aldyn alý úshin prokýratýra organdary olardyń jumysyn baqylaityn agenttiktiń jaýapkershiligin arttyrý tásilderin qaita qarastyrýda», - dep túiindedi Ǵizat Nurdáýletov.
