Foto: ©REUTERS
Qańtardaǵy tártipsizdikterge qatysty tergeý barysynda UQK men birneshe oblystaǵy politsiia departamentteriniń basshylary kúdikti dep tanyldy. Bul týraly Bas prokýratýranyń birinshi qyzmet basshysynyń orynbasary Eldos Qilymjanov málimdedi, - dep habarlaidy Tengrinews.kz tilshisi.
"UQK jáne Almaty, Jambyl jáne Qyzylorda oblystaryndaǵy Politsiia departamentteriniń, Almaty áýejaiy ǵimaratyn qaraýsyz qaldyryp ketý deregi boiynsha jumystar jalǵasady. Bul organ jetekshileri kúdikti retinde tanylǵan.
Buǵan deiin Jambyl oblystyq Politsiia departamenti bastyǵynyń burynǵy orynbasary ustalǵan bolatyn. Ol qyzmettik qarýdy saqtaýǵa jaýapty bolǵan jáne arsenaldyń bir bóligin talan-tarajǵa salýǵa jol bergen. Nátijesinde, qylmyskerler 610 qarý-jaraq, sonyń ishinde pýlemet, tapansha jáne granatometterdi alyp ketti", - dedi Qilymjanov.
Onyń aitýynsha, qazirgi ýaqytta 206 qarý ǵana tabylǵan, qalǵany qylmyskerler qolynda.
"Sondai-aq, Almaty áýejaiynyń jelilik politsiia bóliminiń bastyǵy da ustaldy. Ol óziniń qyzmettik mindetterin oryndamai, áýejaidy qaraýsyz qaldyrǵan, sol arqyly ony basyp alýǵa múmkindik bergen. Saldarynan qomaqty shyǵyn keltirilip, áýejai infraqurylymy buzylyp, kásipkerlerdiń múlki urlanyp, jolaýshylardyń ómiri men densaýlyǵyna qaýip tóndi", - dedi Qilymjanov.
